هاتووچۆی کوردستان: گرێبەستی ئەلیکترۆنیی ئۆتۆمبێل 60 ڕۆژ کاری پێدەکرێت

ئاڤا نیوز

بەڕێوەبەرایەتیی گشتیی هاتووچۆی هەرێمی کوردستان دەڵێت، گرێبەستی ئەلیکترۆنیی نێوان کڕیار و فرۆشیاری ئۆتۆمبێلی ژمارە کاتی تەنیا ماوەی 60 ڕۆژ کاری پێ دەکرێت.

 

ئەوەی پێویستە بیزانیت: بۆ نموونە، ئەگەر کڕیار و فرۆشیار بیانەوێ گرێبەستەکە هەڵبوەشێننەوە، پێویستە بەر لە 60 ڕۆژەکە سەردانی بەشە یاساییەکانی بەڕێوەبەرایەتییەکانی هاتووچۆ بکەن، بڕی 20 هەزار دینار بۆ هەڵوەشاندنەوەی گرێبەستەکە بدەن، بەهیچ جۆرێکیش ماوەکەی درێژ ناکرێتەوە.

 

لێدوانی فەرمی: هێمن حەمەدەمین، وتەبێژی هاتووچۆی هەولێر بە ئاڤای گوت، پێویستە هاونیشتمانیان بزانن، کاتێک لەسەر گرێبەستەکە نووسراوە 60 ڕۆژ ئێمە، بە ڕۆژ مامەڵە دەکەین و ناوترێ دوو مانگ، چونکە مانگ هەیە 28 ڕۆژ و مانگ هەیە 31 ڕۆژە، ئێمە مامەڵە لەگەڵ ڕۆژ دەکەین نەوەک مانگ.

 

زانیاریی زیاتر: بەگوێرەی بەڕێوەبەرایەتی گشتیی هاتووچۆی هەرێمی کوردستان لە دوای 60 ڕۆژەکە، هەر ڕۆژێک بڕی 10 هەزار دینار سزای دارایی دەنووسرێت.