تورکیا هێزەکانی لە عەفرینی ڕۆژئاوای کوردستان دەکشێنێتەوە

ئاڤا نیوز

 

هێزەکانی تورکیا بە قۆناغ دەستیانکردووە بە کشانەوە و چۆڵکردنی بنکەکانیان لە شاری عەفرینی ڕۆژئاوای کوردستان و بنکە و بارەگاکانیان ڕادەستی ئیدارەی شارەکە دەکەن کە سەر بە حکومەتی نوێی سووریایە.

 

وێنە گەورەکە: ساڵی 2018 ئۆپۆزسیۆنی سووریا بە پشتیوانیی هێزەکانی تورکیا، شاری عەفرینی ڕۆژئاوای کوردستانی لەژێر دەستی هێزەکانی هەسەدە دەرهێنا و بەهۆیەوە دەیان هەزار کورد ئاوارە بوون، بەڵام لەدوای ڕووخانی دەسەڵات و هاتنی حکومەتی نوێی سووریا، دۆخی عەفرین باشتربووە و بەشێک لە ئاوارەکانیش بۆ ناوچەکانی خۆیان گەڕاونەتەوە.

 

زانیاریی بەدەستهاتوو: پاڵپشت بە سەرچاوە تایبەت و خۆجێیەکان، ڕادیۆی مۆنتی کارلۆی نێودەوڵەتی بڵاوی کردەوە، لە چەند کاتژمێری ڕابردوودا یەکەکانی سوپا و پۆلیسی تورکیا حەوت بنکە و بارەگایان لە شاری عەفرین و ناحیەی جەندریسی دەوروبەری حەلەب ڕادەستی هێزەکانی سەر بە حکومەتی سووریا کردووەتەوە.

 

لەناو ئەو شوێنانەی ڕادەستکراونەتەوە چوارگۆشەی ئەمنیی لە عەفرین و جەندریس لەگەڵ ژمارەیەک قوتابخانە هەن کە پێشتر وەک بنکەی سەربازیی تورکیا بەکارهێنراون، هاوکات یەکەی کۆماندۆی سەربە سوپای تورکیاش گرتەیەکی ڤیدیۆیی بڵاوکردووەتەوە و تیایدا کۆتاییهاتنی ئەرکەکانی لە عەفرین ڕاگەیاندووە.

 

باکگراوند: مانگی شوباتی ئەمساڵ ئەحمەد شەرع، سەرۆککۆماری سووریا سەردانی شاری عەفرینیی کرد و ڕایگەیاند، لە سووریا کار بۆ بنەمای هاووڵاتیبوون دەکات و دەشیەوێت کۆتایی بەو نەهامەتییانە بهێنێت کە خەڵکی عەفرین ڕووبەڕووی بوونەتەوە.