ئەندامێکی پەرلەمانی عێراق: ناردنی بابەتی داهاتی نانەوتی بۆ ئەنجوومەنی دەوڵەت تەنیا کات کوشتنە

ئاڤا نیوز

 

ئەندامێکی پەرلەمانی عێراق دەڵێت، ڕەوانەکردنی مووچەی مووچەخۆران بەندە بە دەرەنجامی کۆبوونەوەکانی نێوان هەولێر و بەغدا. لەبارەی داهاتی نانەوتی ئەو ئەندامەی پەرلەمانی عێراق دەڵێت، "ناردنی ئەو پرسە بۆ ئەنجوومەنی دەوڵەت، کات کوشتنە."

 

وێنە گەورەکە: هەرێمی کوردستان و حکومەتی عێراق ڕێککەوتوون لەسەر هەناردەکردنەوەی نەوتی هەرێمی کوردستان، بەڵام لەسەر داهاتی نانەوتی بۆچوونی جیاوازیان هەیە و هێشتا نەگەیشتوون بە ڕێککەوتن، ئێستا ئەنجوومەنی وەزیرانی عێراق لەبارەی داهاتی نانەوتییەوە چاوەڕێی ڕاوێژی یاسایی ئەنجوومەنی دەوڵەت دەکات.

 

لێدوانی فەرمی: د. ئامانج هەرکی، ئەندامی پەرلەمانی عێراق بە ئاڤا میدیای گوت: لە کۆبوونەوەی دوێنێی ئەنجوومەنی وەزیرانی عێراق بە شێوەیەکی بەرفراوان باس لە هەناردەکردنەوەی نەوتی هەرێمی کوردستان کراوە و ڕێککەوتن کراوە لەبری پارەی کاش بۆ خەرجی کۆمپانیاکان نەوتیان پێبدرێت.

 

- کۆمپانیاکان داوایان کردبوو دادگاییەکی نێودەوڵەتی وەک لایەنی سێیەم ببێتە نێوەندگیر بەڵام حکومەتی عێراق ئەم داواکارییەی پەسەند نەکرد و دووپاتیان کردووەتەوە دادگاکانی عێراق ئەم بابەتە یەکلایی دەکەنەوە چونکە ئەمە پرسێکی ناوخۆیە.

 

- لەسەر هەناردەکردنەوەی نەوتی هەرێمی کوردستان تەنیا ئەوە ماوە وردبینی ڕێککەوتنەکە بکرێت و ڕەوانەی وەزارەتی نەوت بکرێت بۆ ئەوەی بکەوێتە باری جێبەجێکردن. ئەم بابەتە هیچ کێشەیەکی بۆ دروست نابێت و نزیکین لە هەناردە کردنەوەی نەوت.

 

لەلایەکی دیکە: بەگوتەی د. ئامانج هەرکی لەبارەی داهاتی نانەوتییەوە، "گفتوگۆکان بەردەوامن لەسەر داهاتی نانەوتی، ئەگەر بەغدا داواکاری و بیانوی هەبێت، دەبێت حکومەتی هەرێمی کوردستان بە دوای ڕێگە چارەی دیکەدا بگەڕێت. 

 

ئەوەی پێویستە بیزانیت: ئەو ئەندامەی ئەنجوومەنی نوێنەرانی عێراق پێی وایە، "دوای هەناردەکردنەوەی نەوت و یەکلایی بوونەوەی داهاتی نانەوتی، مووچەی ئەو چەند مانگە دەنێردرێت و مووچەی مانگەکانی دیکەش مسۆگەر دەکرێت.

 

- ناردنی بابەتی داهاتی نانەوتی بۆ ئەنجوومەنی دەوڵەت، کات کوشتنە و هەموو کات بەغدا بیانوی نوێی هەیە و گرفت لەبەردەم هەنگاوەکانی چارەسەرکردنی کێشەکان دروست دەکات.

 

- ئێستا هیچ بیانوێک و نەماوە چاوەڕیی جێبەجێ کردنی بڕیارەکان دەکەین، ناردنی مووچەش بەندە بە دەرەنجامی کۆبوونەوەکان.