ئاڤا ئامانجی ئۆپەراسیۆنە هاوبەشەکەی کوردستان و عێراق لە کەرکووک ئاشکرا دەکات

ئاڤا نیوز

 

هێزە ئەمنییەکانی هەرێمی کوردستان و سوپای عێراق لە سەرلەبەیانیی ئەمڕۆ چوارشممەوە هەڵمەتێکی کێوماڵکردنی هاوبەشیان لە سنووری ناحیەی شوانی پارێزگای کەرکووک دەستپێکردووە، لە هەڵمەتەکەدا کێوماڵی ئەو شوێنانە دەکرێت کە گومان دەکرێت مۆڵگەی چەکدارییان تێدابێت، هاوکات ئەوانەشی داواکراون دەستگیر دەکرێن.

 

وێنە گەورەکە: لە سنووری ناوچەکانی ماددەی 140 بەهۆی بوونی بۆشایی ئەمنی لەنێوان پێشمەرگە و هێزەکانی عێراق، داعش زۆرجار ئەم بۆشاییە بۆ خۆڕێکخستنەوە و ئەنجامدانی هێرش دەقۆزێتەوە، هێزە ئەمنییەکانیش بۆ گەرەنتی ئاسایشی ناوچە هاوبەشەکانیان ناوەناوە هەڵمەتی ئەمنیی ئەنجام دەدەن.

 

زانیاریی لە پەیامنێرەوە: سەرچاوەیەکی ئاگادار لە هەڵمەتەکە بە دیار محەممەد، پەیامنێری ئاڤای لە کەرکووک ڕاگەیاندووە، ئەم بەیانییە لە ناوچەی شوان هەڵمەتێکی کێوماڵکردنیان دەستپێکردووە، لە هەڵمەتەکەدا هێزەكانی ئۆپەڕاسیۆنی دەزگای ئاسایشی هەرێمی کوردستان، دژەتیرۆر و هێزێكی فیرقەی هەشتی سوپای عێراق بەشدارن.

 

ئاماژەی بەوەشكرد، ئامانجی هەڵمەتەکە جگە لە گەرەنتیکردنی ئاسایشی ناحیەی شوان و تەواوی گوندەکانی کە سەرجەمیان کوردنشینن، ئامانجێکی دیکەش لێی دەستگیرکردنی ئەو کەسانەیە کە لەلایەن دادگاوە داواکراون.