وەزارەتی بازرگانیی عێراق دەنگۆیەک لەبارەی بریکارەکانی خۆراک ڕەتدەکاتەوە

ئاڤا نیوز

وەزارەتی بازرگانیی عێراق ئەو دەنگۆیانە ڕەتدەکاتەوە کە باس لە زیادبوونی ئەو بڕە پارەیە دەکەن کە لەلایەن بریکارەکانی خۆراکەوە لە هاووڵاتییان وەردەگیرێت و ئاماژە بۆ ئەوە دەکات بڕی وەرگیراو هەر 500 دینارە و هیچ گۆڕانکارییەک ڕووینەداوە.

 

چیرۆکی سەرەکی: لە هەندێک ماڵپەڕ و تۆڕە کۆمەڵایەتییەکان و دەزگاکانی ڕاگەیاندن هەواڵی ئەوە بڵاوکرابوویەوە گوایە پارەی وەرگیراو لە هاووڵاتییان لەلایەن بریکارەکانی خۆراکەوە لە بەرامبەر سەبەتەی خۆراک زیاد کراوە.

 

ڕاگەیێنراوی فەرمی: بەگوێرەی ڕاگەیێنراوێکی وەزارەتی بازرگانیی عێراق کە وێنەیەکی دەست ئاڤا میدیا کەوتووە، وەزارەتەکە داوا لە بریکارانی خۆراک و بریکارانی ئارد لە بەغدا و پارێزگاکان دەکات سەردانی ناوەندەکانی دابەشکردن بکەن بۆ وەرگرتنی پێداویستییەکانی سەبەتەی خۆراک و ئارد، بەمەبەستی دابەشکردنیان بەسەر هاووڵاتیاندا".

 

لەهەمان کاتدا: وەزارەتەکە ئەو دەنگۆیانە ڕەتدەکاتەوە گوایە ئەو بڕە پارەیەی لەلایەن بریکارەکانەوە لە هاووڵاتیان وەردگیرێت زیاد کرابێت و دەڵێت: "بڕی وەرگیراو لە هاووڵاتی تەنیا (500 دینارە)".