کۆمپانیاکانی نەوت نەرمی دەنوێنن و لە مەرجێک سازش بۆ بەغدا دەکەن

ئاڤا نیوز 

 

گوتەبێژی حکومەتی هەرێمی کوردستان دەڵێت، "کۆمپانیاکانی نەوت ڕازی بوون لەلایەن دادگاکانی عێراق مامەڵەیان لەگەڵ بکرێت و مافەکانیان زامن بکرێت و عێراقیش ڕازی بووە لەسەر ئەمە".

 

وێنە گەورەکە: پرسی نەوت یەکێک لە دوو لەمپەرە گەورەکەی بەردەم ناردنی مووچەی خەڵکی کوردستانە، بە نەمانی ئەو لەمپەرە ئاسۆیەکی نوێ بۆ چارەسەرکردنی کێشەکانی نێوان هەولێر و بەغدا و واژۆکردنی ڕێککەوتنێکی گشتگیر لەبارەی پرسی مووچە دەکرێتەوە. هەوڵەکانیش بۆ یەکلاکردنەوەی داهاتی ناوخۆی کوردستان چڕکراونەتەوە کە دووەم لەمپەری بەردەم ناردنی مووچەیە.

 
لێدوانی فەرمی: پێشەوا هەورامانی، گوتەبێژی حکومەتی هەرێمی کوردستان بە ئاڤای ڕاگەیاند، ئاستی بەرهەمهێنانی نەوتی هەرێمی کوردستان گەیشتۆتە 233 هەزار بەرمیل و لەو ڕێژەیەش 50 هەزاری پشکی هەرێمی کوردستان دەردەهێنرێت، ئەوەی تریش دەدرێتە عێراق.

 

بەگوتەی پێشەوا هەورامانی پێشکەوتنی باش هەیە لە ڕێکەوتنی سێ قۆڵی نێوان حکومەتی هەرێمی کوردستان کۆمپانیاکان و حکومەتی عێراق، پێشتر کۆمپانیاکان داوایان دەکرد، کە لەلایەن دادگاکانی دەرەوە مافەکانیان زامن بکرێت، بەڵام ئێستا ڕازی بوون لەلایەن دادگاکانی عێراق مامەڵەیان لەگەڵ بکرێت و مافەکانیان زامن بکرێت و عێراقیش ڕازی بووە لەسەر ئەمە.

 

لەلایەکی دیکە: هەورامانی جەخت دەکاتەوە، "هەرێمی کوردستان لەبارەی نەوت هیچ بیانویەکی  بۆ عێراق نەهێشتووەتەوە، ئامادەین نەوت بدەینە بەغدا و نووسراو کراوە و چاوەڕێی وەڵامی حکومەتی عێراق دەکەین، بەڵام لەبەرامبەر ئەوە دەبێت مووچەی فەرمانبەرانی هەرێمی کوردستان دابین بکرێت".

 

ئەوەی پێویستە بیزانیت: وەک گوتەبێژی حکومەتی هەرێمی کوردستان دەڵێت، "ئەوەی گرنگە چاوەڕێی حکومەتی عێراقین ڕازمەندی بدات و نەوتەکە وەربگرێت لەبەرامبەر ئەوە مووچەکانی مانگی حەوت و هەشت بنێردرێت لەدوای ئەوانەش مووچەکانی دیکە بنێردرێت".