کێشەی کەمی میلاکی وەزارەتی پەروەردە چارەسەر دەکرێت

ئاڤا نیوز

 

گوتەبێژی حکومەتی هەرێمی کوردستان لەبارەی کەمی کێشەی میلاک و قوتابیان لە وەزارەتی پەروەردە دەڵێت، "سێ وەزیر بۆ دانانی میکانیزمێک بۆ چارەسەری کێشەکان ڕاسپێردراون".

 

چیرۆکی سەرەکی: پێشنیوەڕۆی ئەمڕۆ چوارشەممە 17-9-2025، بەسەرپەرشتیی سەرۆکوەزیران مەسرور بارزانی و ئامادەبوونی قوباد تاڵەبانی، جێگری سەرۆکوەزیران کۆبوونەوەی هەفتانەی ئەنجوومەنی وەزیران بەڕێوەچوو، چەند پرسێک تاوتوێ کران.

 

لێدوانی فەرمی: پێشەوا هەورامانی، گوتەبێژی حکومەتی هەرێمی کوردستان بە ئاڤا میدیای ڕاگەیاند: وەزیری پەروەردە لە کۆبوونەوەکەدا لەسەر دروستکردنی قوتابخانە نوێیەکان و نۆژەنکردنەوەیان و چاپکردنی کتێب و دابینکردنی سوتەمەنی بۆ وەرزی سەرما ڕوونکردنەوەی دا.

 

ئەوەی پێویستە بیزانیت: گوتەبێژی حکومەتی هەرێمی کوردستان گوتیشی: وەزارەتی پەروەردە لە هەندێک شوێن کێشەی میلاک و بابەتی ئیدارییان هەیە، سەرۆکوەزیران مەسرور بارزانی جەختی لەسەر ئەوە کردەوە، کە نابێت قوتابیان لە خوێندن بێبەش بن، دەبێت ئەوەی پێویستیانە بۆ ساڵی خوێندن بۆیان جێبەجێ بکرێت.

 

هۆکارە زانراوەکان: هاوکات لە سەرەتای ئەمساڵەوە زیاتر لە حەوت هەزار مامۆستا خانەنشین بوون، بەشێک لە مامۆستاکانیش بەهۆکاری جۆراوجۆر مۆڵەتیان وەرگرتووە، ئەمەش بۆشایەکی زۆری لە پەروەردەدا دروست کردووە، پێشەوا هەورامانی لەوبارەیەوە دەڵێت: لەبارەی پڕکردنەوەی شوێنی ئەم مامۆستایانە قسە کرا و باس لە دۆزینەوەی ڕێگەچارەیەکیش کرا.

 

چارەسەرەکان؛ سەرۆکوەزیران مەسرور بارزانی لە کۆبوونەوەکەدا هەریەک لە وەزیری  پەروەردە، پلاندانان و خوێندنی باڵای ڕاسپارد، تا پێکەوە میکانیزمێک بدۆزنەوە، بۆ ئەوەی بۆشایی لە پەروەردەدا دروست نەبێت.