عەلی لاریجانی: لەگەڵ محەممەد بن سەلمان تاوتوێی هەماهەنگیی بەرگریی ئێران و سعوودیەمان کرد

ئاڤا نیوز

 

ئەمینداری ئەنجوومەنی باڵای ئاسایشی نیشتمانیی ئێران لە ڕیاز لەگەڵ محەممەد بن سەلمان، شازادەی جێنشینی سعوودیە کۆبووەوە.

لێدوانی فەرمی: عەلی لاریجانی، ئەمینداری ئەنجوومەنی باڵای ئاسایشی نیشتمانیی ئێران دوای کۆبوونەوەی لەگەڵ محەممەد بن سەلمان، شازادەی جێنشینی سعوودیە لە ڕیازی پایتەختی ئەو وڵاتە بە میدیاکانی ڕاگەیاند: سعوودیە و دەوڵەتانی ڕۆژهەڵاتی ناوەڕاست گەیشتوون بە هەمان بۆچوون و تێگەیشتنی ئێران کە دەوڵەتێکی دیاریکراو بووە بە هۆی پشێوی و ڕێگر دەبێت لە سەقامگیریی ناوچەکە، هێرشکردنە سەر قەتەر و بەردەوامی کۆمەڵکوژیی غەززە ئەوەیان بۆ هەموو دەوڵەتان ئاشکرا کرد.

 

لەلایەکی دیکە؛ ئەمینداری ئەنجوومەنی باڵای ئاسایشی نیشتمانیی ئێران سەبارەت بە پەیوەندی نێوان تاران و ڕیاز ڕایگەیاند: لەگەڵ سعوودیە پێکەوە کار دەکەین بۆ هەماهەنگی هەرێمی و پتەوکردنی پەیوەندیەکانمان.

 

گوتیشی، پێکەوە کاریگەرییەکی گەورەمان دەبێت لە گەڕاندنەوەی ئاشتی و سەقامگیری بۆ ڕۆژهەڵاتی ناوەڕاست، هەردوولا هاوڕابووین لەسەر هەماهەنگیی  بەرگری لە نێوان ئێران و سعوودییە و لە داهاتوودا ئەم هەماهەنگییە لە شێوەی گرووپی جیاواز ڕێکدەخرێت و کاریگەرییەکی گەورە پیشان دەدات.