خوێندنی بەخۆڕایی بۆ منداڵی شەهیدان و کەمئەندامانی سەنگەر دابین دەکرێت

ئاڤا نیوز

وەزارەتی پەروەردەی حکومەتی هەرێمی کوردستان لە گشتاندێکدا سەرجەم بەڕێوەبەرایەتی گشتیی پەروەردەکانی ئاگادار کردووەتەوە کە دەبێت ناوەندەکانی خوێندنی ناحکومی، کورسی خوێندن بەخۆڕایی بۆ منداڵانی شەهید و کەمئەندامانی سەنگەر دابین بکەن، کە بەهۆیەوە سەدان قوتابی سوودمەند دەبن.

چیرۆکی سەرەکی: پشتبەست بە ڕێنمایی ژمارە یەک ساڵی 2021، ماددەی 47 بڕگەی پێنجەمی خاڵەکانی یەک و دووی وەزارەتی پەروەردە، مەرجە هەموو باخچەی ساوایان، قوتابخانە و پەیمانگە بە ناوخۆیی و نێودەوڵەتییەوە، کورسی خوێندن بۆ کەس و کاری شەهیدان، کەمئەندامانی سەنگەر بە خۆڕایی دابین بکەن.

لێدوانی فەرمی: لوقمان سەعید، بەڕێوەبەری گشتیی پەروەردەی هەولێر بە ئاڤای وت، "گشتاندنەکەمان بۆ سەرجەم ناوەندەکانی خوێندنی تایبەت ناردووە، کە مەرجە کورسی تایبەت بۆ منداڵانی خانەوادەی شەهیدان و کەمئەندامانی سەنگەر دابین بکەن بەبێ بەرامبەر، هەر ناوەندێکیش پابەند نەبێت ڕێکاری یاسایی لەبەرامبەر دەگیرێتە بەر."

ئەمەش بزانە: دابینکردنی ڕێژەی کورسییەکان بەگوێرەی دۆخی قوتابخانەکە دەبێت، لەکاتی پێشکەشکردنی داواکاری بۆ کردنەوەی ناوەندەکە وەک مەرج بەسەریاندا دەسەپێنرێت، بەشێوەیەکی گشتیی لەهەر ناوەندێک پێنج کورسی دەبێت.