لەماوەی هەشت مانگدا زۆرترین کەرەستەی پاککردنەوە هاوردەی کوردستان کراوە

ئاڤا نیوز

بەگوێرەی ئامارەکانی وەزارەتی بازرگانی و پیشەسازیی حکومەتی هەرێمی کوردستان لە هەشت مانگی ڕابردوودا سەدان تۆن بەرهەمی ماددە پیشەسازیی کیمیایی و پیشەسازی پێوەبەستراو مۆڵەتی وەرگیراوە و هاوردەی هەرێمی کوردستان کراوە.

وێنە گەورەکە: هەرێمی کوردستان هاوردەکاری کاڵا جۆراوجۆرانەکە، زۆرترین قەبارەی بازرگانی لەگەڵ تورکیا و ئێران و چین هەیە، ساڵانە بە ملیاران دینار کۆمپانیاکان کاڵا لەو وڵاتانە هاوردەی هەرێمی کوردستان دەکەن.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "لەماوەی هەشت مانگی ڕابردوو 563 مۆڵەت بۆ  پیشەسازی کیمیایی و پیشەسازی پێوەبەستراو دراوە کە 100 جۆر لەخۆدەگرێت زیاتر کەرستەی پاککردنەوەیە، هاوردەی هەرێمی کوردستان کراون."

ئەمەش بزانە: تاوەکو ئێستا زیاتر لە دوو هەزار مۆڵەت بە کۆمپانیاکان دراوە بۆ ئەوەی کاڵا هاوردەی هەرێمی کوردستان بکەن، دوای پیشەسازی کیمیایی و پیشەسازی پێوەبەستراو هاوردەی بەرهەمەکانی کۆمەڵەی ڕووەک زۆرترین مۆڵەتی بۆ وەرگیراوە، ئینجا هێنانی ئاژەڵ لە پلەی سێیەم و پلەی چوارەمیشدا بەرهەمەکانی ماددەی خۆراکی دێن، کە زۆرترین مۆڵەتی بۆ هاوردەکردنیان پەسەند کراوە.