دابەشکردنی پارەی گەنمی بەشێک لە جووتیاران دوادەکەوێت

ئاڤا نیوز

بەشێك لەو جووتیارانەی كە ئەمساڵ گەنمی ماوەیان ڕادەستی کۆمپانیای کەرتی تایبەت كردووە دابەشكردنی پارەكەیان دوادەكەوێت و بەڕێوەبەری گشتیی بازرگانیی هەرێمی كوردستانیش وادەی دابەشكردنەكەی ئاشكرا دەكات.

چیرۆکی سەرەکی: جووتیارانی هەر چوار پارێزگای کوردستان لە ڕێگەی کۆمپانیاکانی داس و قەیوان گەنمی ماوەیان ڕادەست کردووە، گەنمی پلەیەک تۆنی بە 550 هەزار و گەنمی پلەدوو تۆنی بە 525 هەزار وەرگیراوە، بە کۆی گشتیش هەردوو کۆمپانیا 31 هەزار و 102 تۆن گەنمی ماوەیان وەرگرتووە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "بڕیاربوو ئەمڕۆ پارەی گەنمی ئەو جووتیارانە دابەش بکرێت، لەلایەن هەردوو کۆمپانیاکە، بەڵام بەهۆی چەند ڕێکارێکی کارگێری دواکەوتووە، بڕیارە هەفتەی داهاتوو لەگەڵ خەرجکردنی پارەی بنەتۆکان ئەو بڕەش خەرج بکرێت."

ئەمەش بزانە:  کۆمپانیای داس 18 هەزار و کۆمپانیای قەیوان کە 13 هەزار و 102 تۆن گەنمی لە جووتیاران وەرگرتووە، زیاتر لە 16 ملیار دینار بۆ جووتیاران خەرج دەکەن، بەرواری 2025-10-15 دواین وادەیە بۆ خەرجکردنی تەواوی پارەکە.