هۆشدارییەک لە بەڕێوەبەرایەتیی کەشناسی و بومەلەرزەزانی کوردستانەوە

ئاڤا نیوز

 

بەڕێوەبەرایەتیی گشتیی کەشناسی و بومەلەرزەزانی هەرێمی کوردستان، هاونیشتمانییان ئاگادار دەکاتەوە کە بەیانیی ڕۆژی هەینی، ڕێکەوتی 19ی ئەیلولی 2025، کەش و هەوای هەرێمی کوردستان بە گشتی ناسەقامگیر دەبێت ئەمەش بەهۆی ڕەشەبا و بەرزبوونەوەی ڕێژەی تۆز و خۆڵ.

 

هۆکارە زانراوەکان؛ بەگوێرەی پێشبینییەکانی بەڕێوەبەرایەتیی گشتیی کەشناسی، ئەو ڕەشەبا و تۆز  و خۆڵە لە ناوچەکانی ڕۆژئاوای هەرێمی کوردستانەوە سەرچاوە دەگرێت. پێشبینی دەکرێت لە کاتەکانی نیوەڕۆدا تەواوی ناوچەکانی هەرێمی کوردستان بگرێتەوە.

 

کاریگەری و لێکەوتەکان؛ لە ئەنجامی بەرزبوونەوەی خێرایی با، مەودای بینینی ئاسۆیی کەم دەبێتەوە بۆ کەمتر لە پێنج کیلۆمەتر. لە هەندێک ناوچە، بە تایبەت لە ناوچەکانی باشووری هەرێمی کوردستان، مەودای بینین بۆ کەمتر لە یەک کیلۆمەتر دادەبەزێت، کە ئەمەش کاریگەری نەرێنی لەسەر هاتووچۆ و چالاکییەکانی دەرەوە دەبێت.

 

لەلایەکی دیکە؛ خێرایی با بۆ کاتەکانی نیوەڕۆ دەگاتە بەرزترین ئاستی خۆی، بە شێوەیەک کە پێشبینی دەکرێت لە هەندێک ناوچەدا بگاتە سەرووی 50 کیلۆمەتر لە کاتژمێرێکدا.

 

ئەوەی پێویستە بیزانیت: بەڕێوەبەرایەتیی کەشناسی پێشبینی دەکات لە کاتەکانی ئێوارەدا، کاریگەری ڕەشەبا و تۆز و خۆڵ لاواز دەبێت و بەرەو کاتەکانی شەویش، کەش و هەوا بە تەواوی سەقامگیر دەبێتەوە.