هاتووچۆی سلێمانی چەند ڕێکارێک بۆ ساڵی نوێی خوێندن دەگرێتەبەر

ئاڤا نیوز

لەگەڵ دەستپێکردنی ساڵی نوێی خوێندن، بەڕێوەبەرایەتیی هاتووچۆی سلێمانی چەند ڕێنماییەک دەردەکات و دووپاتی دەکاتەوە لە 21ـی ئەم مانگەوە ژمارەیەک ڕێکاری نوێ جێبەجێ دەکەن.

وێنە گەورەکە: 21ـی ئەم مانگە ساڵی نوێی خوێندن لە هەرێمی کوردستان دەستپێدەکات، وەزارەتی پەروەردە و لایەنە پەیوەندیدارەکانی دیکە دەستیان بە ئامادەکاری بۆ ساڵی نوێی خوێندن کردووە.

ڕاگەیێنراوی فەرمی: بەڕێوبەرایەتیی هاتووچۆی سلێمانی بڵاوی کردووەتەوە لەگەڵ دەستپێکی وەرزی نوێی خوێندن چەند ڕکارێکی نوێ جێبەجێ دەکرێن و هاتووچۆی بەشێک لە شەقامەکان ڕێکدەخرێنەوە.

زانیاریی زیاتر: ڕێنمایی و ڕێکارە نوێیەکانی هاتووچۆی سلێمانی بەمجۆرە دەبێت:

یەکەم: لە ڕۆژی یەکشەممە 21ـی ئەم مانگەوە ، هەموو ڕۆژێک لەکاتژمێر 07:30 بۆ 08:30 بەیانی هاتنە ناوەوەی بارهەڵگرەکان بۆ ناو شاری سلێمانی لەڕێگەی بازگەکان و سنووری شەقامی بازنەیی مەلیک مەحموود  قەدەغە دەکرێت، ئەم ڕێکارە ڕۆژانی هەینی ناگرێتەوە.

دووەم: پێویستە شۆفێران ڕەچاوی خێراییەکان بکەن لەناوچەکانی نیشتەجێبوون و بەردەم سەرجەم ناوەندەکانی خوێندن، ئاگاداری زیاتریان هەبێت بۆمنداڵان و پیادە ڕەوەکان.

سێیەم: شۆفێرانی ئەو پاسانەی منداڵ و قوتابیان دەگوازنەوە دەبێت ڕەچاوی ژمارەی یاسایی قوتابیان لەناو پاسەکانیان بکەن و سەرنشینی زیادە سەرنەخەن، ڕێگەش بە منداڵان نەدەن بەشێک لەجەستەیان لەجامەکان دەربکەن، لەکاتی سەرکەوتن و دابەزین لەبەردەم قوتابخانەکان ئاستەنگ و قەرەباڵغی دروست نەکەن.

ئەوەی پێویستە بیزانیت: بەرێوەبەرایەتیی هاتووچۆی سلێمانی دووپاتی دەکاتەوە هەر شۆفێرێک پابەندی ئەم ڕێنمایی و ڕێکارانە نەبێت، لێپێچینەوەی یاسایی لەگەڵ دەکرێت.