بڵاوکردنەوەی دیمەنی ڕووداوەکانی تاوان قەدەغە دەکرێت

ئاڤا نیوز

دیوانی ئەنجوومەنی وەزیرانی کوردستان نووسراویک ئاراستەی وەزارەت و دامودەزگاکان دەکات و ڕایدەگەیێنێت، ڕیگە بە ڕووماڵکردنی ڕووداوەکانی تاوان و تۆمەتباران نەدەن.

چیرۆکی سەرەکی: بۆ پاراستنی رێرەوی لیکۆڵینەوە یاساییەکان، دەستەی مافی مرۆڤی هەرێمی کوردستان داوای لە ئەنجوومەنی وەزیرانی کوردستان کردووە ڕووماڵی ڕاستەوخۆ و ناڕاستەوخۆی ڕووداوەکانی تاوان و تاوانباران قەدەغە بکرێت.

ڕاگەیێنراوی فەرمی: فەرمانگەی میدیا و زانیاریی حکومەتی هەرێمی کوردستان بڵاویکردەوە، بەپێی گشتاندنێكی سەرۆكایەتیی دیوانی ئەنجوومەنی وەزیران، كە ئاراستەی گشت وەزارەت و دامودەزگاکانی حکومەت كراوە، لەمەودوا ڕێگە بە هیچ كەناڵ و پەڕەیەکی تۆڕی كۆمەڵایەتی نادرێت، دیمەن و ڤیدیۆی ڕووداوی تاوان و تۆمەتباران، شوێن و كاتی تاوانەكان بڵاو بكەنەوە و ڕووماڵی بکەن.

زانیاریی زیاتر: ئەم گشتاندنە لەسەر بنەمای داواكارییەكی دەستەی سەربەخۆی مافی مرۆڤ بۆ ئەنجوومەنی وەزیران کراوە، تێیدا داوای كردووە بۆ پاراستنی ڕێڕەوی لێكۆڵینەوە و لایەنی دەروونی و كۆمەڵایەتیی ژیانی خەڵك و نەقۆستنەوەی ڕووداوەكان بۆ دووبەرەكیی سیاسی و كۆمەڵایەتی، ڕێگە نەدرێت ڕووماڵی ڕاستەوخۆ و ناڕاستەوخۆی تاوان و تۆمەتباران بكرێت، ئەمەش لەپێناو سەلامەتیی گشتی و ئاسایشی تاك و كۆمەڵگەیە، رێزگرتنە لە رێرەوی لێکۆڵینەوە یاساییەکان و بنەماکانی مافی مرۆڤ.