سوودانی سەرۆکی دیوانی وەقفی سوننی لە پۆستەکەی دوورخستەوە

ئاڤا نیوز

سەرۆکوەزیرانی عێراق بڕیاریدا مشعان موحی خەزرەجی، سەرۆکی دیوانی وەقفی سوننی، لە پۆستەکەی دووربخاتەوە.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، ئەم بڕیارە بە پشتبەستن بە نووسراوێک بووە لە کۆمەڵەی فیقهی عێراقییەوە، کە سێ ناوی جێگرەوەی بۆ وەرگرتنی پۆستەکە کاندید کردووە، بەپێی ماددەی4/ دووەم لە یاسای وەقفی سوننی ژمارە (56) ساڵی .(2012)

لەلایەکی دیکەوە: هەر بەگوێرەی ڕاگەیێنراوەکە سوودانی، عامر شاکر جەنبانی ڕاسپاردووە بۆ ماوەی شەش مانگ بە وەکالەت پۆستی سەرۆکی دیوانەکە بگرێتە ئەستۆ. سوودانی جەنبانی ڕاسپاردووە کار بۆ بەهێزکردنی وتاری میانڕەو و دوورکەوتنەوە لە توندڕەوی بکات و دامەزراوە ئایینییەکە لە هەر جۆرە وەبەرهێنانێکی سیاسی یان هەڵبژاردنێک دووربخاتەوە، بەو شێوەیەی کە پێگە و ڕۆڵی لە کۆمەڵگادا بەهێزتر بکات.

ئەوەی پێویستە بیزانیت: لەسەر کوژرانی عەبدولسەتار قەرەغولی، ئیمام و وتارخوێنی مزگەوتی کەریم ئەلناسر لە ناوچەی دۆرە لە باشووری بەغدا کۆمەڵەی فیقهی عێراقی ڕاگەیێنراوێکی بڵاوکردەوە، ئەوکات پاراستنی مزگەوتەکانی خستبووە ئەستۆی سەرۆکایەتی دیوانی وەقفی سوننی.