وەزارەتی پەروەردەی عێراق بڕیارێک لەبەرژەوەندی قوتابییە دووانەکان دەردەکات

ئاڤا نیوز

بەپێی بڕیارێکی وزارەتی پەروەردەی عێراق، لەمەودوا لەقوتابخانە نایابەکان برایەک یان خوشکێکی دووانە ئەتوانێت ئەوی دیکەیان لەگەڵ خۆیدا بەرێتە قۆناغێکی دیکەوە بەبێ هیچ مەرج و شەرتێک.

چیرۆکی سەرەکی:  وەزارەتی پەروەردەی عێراق بڕیارێکی لە بەرژەوەندی قوتابییە دووانەکان دەرکرد، بەپێی بڕیارە کە ئەگەر یەکێک لە برا یان خوشکە دووانەکان توانی تاقیکردنەوەی قوتابخانە نایابەکان و بەهرەمەندەکان تێپەڕێنێت، ئەوا دەبێت ئەوی دیکەیان بەخۆڕایی و بێ هیچ مەرجێک و تاقیکردنەوەیەک وەربگیرێت.

ئه‌وه‌ی له‌باره‌یه‌وه‌ دەگوترێت: ئەم بڕیارە، هەر زوو کاردانەوەی لەتۆرە کۆمەڵایەتییەکان لێکەوتەوە بەشێک لەهاووڵاتیان ڕەخنەی لێدەگرن و پێیان وایە کاردانەوەی خراپی لەسەر ئاستی خوێندنی قوتابییەکە و قوتابخانە نایابەکان دەبێت، چونکە هەندێک جار ئاستی ژیریی و سەلیقەیی یەکێکیان لەگەڵ ئەوی دیکە جیاوازە.

لەلایەکی دیکەوە: بەشێک لە پسپۆڕانی پزیشکی بڕیارەکە بەئەرێنی وەسف دەکەن و دەڵێن"  زۆربەی ئەو دووانانە ئاستی ژیرییان وەک یەک وایە لەڕووی دەروونیشەوە ناتوانن لە قۆناغەکانی خوێندن یەکتر بەجێبهێڵن ".