ئەو گەنجە کوردەی دوێنێ لە کەرکووک ڕفێندرا هێشتا بێسەروشوێنە

ئاڤا نیوز

شەوی ڕابردوو لە سنووری کەرکووک لەلایەن ژمارەیەک چەکدارەوە هێرش کرایە سەر دوو گەنجی کورد و یەکێکیان بریندارە و ئەوی دیکەیان لەلایەن چەکدارەکانەوە ڕفێندرا.

چیرۆکی سەرەکی: کاتژمێر 11ی شەوی پێنجشەممە 18-9-2025، دوو گەنجی کورد لە گوندی بیبانیی لە ناحیەی پردێی سەر بە پارێزگای کەرکووک، لەنزیک باخەکەی خۆیان لەلایەن چەند چەکدارێکەوە بە چەک هێرشیان کرایە سەر و دەستڕێژی گوللەیان لێ کرا، لە ئەنجامدا یەکێکیان بە ناوی پاڵا نەجمەدین بریندار بوو و لە شوێنی ڕووداوەکە بەجێما و ئەوی دیکەیان بە ناوی سامان واحید لەلایەن چەکدارەکانەوە ڕفێندرا.

زانیاریی بەدەستهاتوو: بەرەبەیانی ئەمڕۆ هێزە ئەمنییەکانی کەرکووک چوونەتە شوێنی ڕووداوەکە و لێکۆڵینەوە و بەدواداچوونیان دەستپێکردووە بۆ ئاشکراکردنی سۆراغی ئەو گەنجە کوردەی کە ڕفێندراوە.

ئەوەی پێویستە بیزانیت: بەپێی لێکۆڵینەوە سەرەتاییەکانی هێزە ئەمنییەکان و شایەدحاڵەکان  چەکدارەکان بەرەو ناوچەی کەڵهوور لە دەوربەری کەرکووک هەڵهاتوون بەڵام تاوەکوو ئێستا شوێنی خۆحەشاردانیان نەزانراوە.