ترەمپ و شی جینگ پینگ لەبارەی کۆتاییهێنان بە شەڕی ڕووسیا و ئۆکراینا گفتوگۆ دەکەن

ئاڤا نیوز

لە پەیوەندییەکی تەلەفۆنیدا سەرۆکی ئەمریکا و سەرۆکی چین گفتوگۆیان لەسەر پەیوەندییە ئابوورییەکانی نێوانیان کرد، بەتایبەتی پرسی خاوەندارێتی تیکتۆک لە ئەمریکا.

چیرۆکی سەرەکی: دۆناڵد ترەمپ، سەرۆکی ئەمریکا و شی جینگپینگ، سەرۆکی چین بە تەلەفۆن گفتوگۆیان لەبارەی پەیوەندییە ئابووریەکان، جەنگی ڕووسیا و ئۆکراینا و خاوەندارێتی تیکتۆک کردووە.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، پەیوەندییەکی تەلەفۆنی زۆر بەرهەمدارم لەگەڵ شی جینپینگ، سەرۆکی چین ئەنجامدا، و ئەو پرسانەی گفتوگۆیان لەبارەوە کراوە بریتین لە بازرگانی، ماددەی فێنتانیل، پێویستی کۆتاییهێنان بە شەڕی نێوان ڕووسیا و ئۆکراینا، و پەسەندکردنی گرێبەستی تیکتۆک.

زانیاریی زیاتر: ترەمپ زیاتر وتی، لەگەڵ سەرۆکی چین ڕێککەوتووین لەسەر ئەوەی لە کۆبوونەوەی لووتکەی ئەپێک لە کۆریای باشوور کۆبوونەوەیەک ئەنجام بدەین و سەرەتای ساڵی داهاتووش سەردانی چین دەکەم و بە هەمان شێوە ئەویش لە کاتێکی گونجاودا سەردانی ئەمریکا دەکات.

لەلایەکی دیکەوە: میدیای فەرمی چین بڵاویکردەوە، شی جینپینگ، سەرۆکی چین لە پەیوەندییە تەلەفۆنییەکەدا داوای لە ترەمپ کردووە، دووربکەوێتەوە لە بڕیارە تاکلایەنەکانی لە کەرتی بازرگانی و پەیوەندییەکەشی بە ئەرێنی و بوونیادنەر وەسفکردووە.

لەبارەی تیکتۆکیشەوە بە ترەمپی وتووە، پێویستە لە ڕێگەی گفتوگۆ و بە پشتبەستن بە یاساکانی بازاڕ چارەسەر بکرێت.