پڕۆژەی ئاوی قوشتەپە 85%ـی تەواو کراوە

ئاڤا نیوز

کارکردن لە پڕۆژەی ئاوی قوشتەپە گەیشتووەتە قۆناغی کۆتایی، بڕیارە لە سەرەتای مانگی داهاتوو پڕۆژەکە بخرێتە خزمەت هاووڵاتییانی ئەو سنوورە. 

وێنە گەورەکە: چەند ساڵێکە هاووڵاتییانی قەزای قوشتەپە، بەهۆی کەمبوونەوەی سەرچاوەی ئاوی خوارنەوە دابەزینی ئاستی ئاوی ژێر زەوی تووشی گرفتبوون ئەمەش بەهۆی ئەوەی قووڵی بیرێک لەو سنوورە دابەزیوە بۆ 700 مەتر، لە کابینەی نۆیەمی حکومەتی هەرێمی کوردستان ئەم پڕۆژە گرنگە لەسەر زێی بچووک جێبەجێکرا و بەتەواوبوونی ناوچەکە لە کەمئاوی ڕزگاری دەبێت.

لێدوانی فەرمی: ڕێزان سەعدی، بەڕێوەبەری ئاوی دەورووبەری هەولێر بە ئاڤا میدیای ڕاگەیاند،ئێستا پڕۆژەکە 85%ـی کارەکانی تەواوبووە، بڕیارە مانگی 10ـی ئەمساڵ قۆناغی یەکەمی پڕۆژەکە تەواو بکرێت و  ئاو بگاتە سەنتەری قوشتەپە، دوای گەیاندنی ئاو بۆ سەنتەری قەزای قوشتەپە قوناغی دووەم دەستپێدەکات ئەویش گەیاندنی ئاو بۆ گوندەکان و دەورووبەری قەزاکە.

زانیاریی زیاتر: پڕۆژەکە لە ڕۆژێكدا توانای پاککردنەوە و ئامادەکردنی 72 هەزار مەتر سێجا ئاوی خواردنەوەی هەیە، هاوکات زیاتر لە63 هەزار هاووڵاتی لەو پڕۆژەیە سوومەند دەبن.

لەلایەکی دیکەوە: بژار مەلا خدر، قایمقامی قەزای قوشتەپە بە ئاڤا میدیای ڕاگەیاند، بە تەواوبوونی ئەو پڕۆژەیە کێشەی کەمئاوی لە سنووری سەنتەری قەزا و دەوروبەری کۆتایی دێت، چونکە پڕۆژەیەکی ستراتیژیە.

باکگراوند:  پڕۆژەی ئاوی قوشتەپە یەکێکە لە پڕۆژە ستراتیژیەکانی کابینەی نۆیەم، ڕۆژی 17-9-2024 سەرۆکوەزیران مەسرور بارزانی، بەردی بناغەی پڕۆژەکەی بە گوژمەی 189 ملیار و 670 ملیۆن دینار دانا. پرۆژەکە سێ کۆگای بە قەبارەی پێنج هەزار مەتر سێجای هەیە، 72 گوند لێی سوودمەند دەبن.