وەزیرێکی پێشووی عێراق: نرخی کورسیی پەرلەمان گەیشتووەتە دوو ملیار دینار

ئاڤا نیوز

 

محەممەد تۆفیق عەلاوی، سیاسەتمەدار و وەزیری پێشووی گەیاندن و پەیوەندییەکانی عێراق، ئاشکرای کرد، نرخی کورسییەکی پەرلەمان لە خولی داهاتوودا لە نێوان ملیارێک بۆ دوو ملیار و نیو دیناردا مامەڵەی پێوەدەکرێت.

 

وێنە گەورەکە: بۆ هەڵبژاردنی پەرلەمانی عێراق کە بڕیارە 11ـی مانگی 11ـی ئەمساڵ بکرێت، زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، چاوەڕێش دەکرێت سەرەتای مانگی داهاتوو بانگەشەی هەڵبژاردن دەست پێ بکات.

 

لێدوانی فەرمی: محەممەد تۆفیق عەلاوی، سیاسەتمەدار و وەزیری پێشووی گەیاندن و پەیوەندییەکانی عێراق، کە ئێستا ئەندامی هاوپەیمانیی "منقذون" ـە لە چاوپێکەوتنێکی تەلەفزیۆنی، ڕایگەیاند: نرخی کورسییەکی پەرلەمانی لە خولی داهاتووی پەرلەماندا گەیشتۆتە ئاستێکی خەیاڵی، بە جۆرێک کە هەندێک لە پارت و لایەنە سیاسییەکان بە کراوەیی بازرگانی بە کورسییەکانەوە دەکەن و نرخی هەر کورسییەک لە نێوان ملیارێک بۆ دوو ملیار و نیو دیناردا دەفرۆشن.

 

زانیاریی زیاتر: وەک بەڵگەیەک بۆ بوونی دیاردەی کڕین و فرۆشتنی دەنگ و کورسی پەرلەمانتاری لە عێراق، عەلاوی ئاماژەی بەوە کرد، یەکێک لەو کەسانەی ویستوویەتی لە ڕێگەی هاوپەیمانێتییەکەی ئەوانەوە خۆی بۆ هەڵبژاردن کاندید بکات، دانی بەوەداناوە کە خاوەنی زیاتر لە هەزار کارتی دەنگدانە کە پێشتر کڕیویەتی بۆ ئەوەی کورسییەک لە پەرلەمان لە مسۆگەر بکات. 

 

کاردانەوەکان؛ لێدوانەکەی عەلاوی نیگەرانییەکی زۆری لە تۆرە کۆمەڵایەتییەکان لەسەر کۆی پڕۆسەی دیموکراسی و هەڵبژاردنەکان لە عێراق دروست کردووە و داوای لێکۆڵینەوە و ڕێوشوێنی پێویست بۆ ڕووبەڕووبوونەوەی ئەم دیاردەیە دەکرێت.