دەوڵەتی یاسا مەرجەکانی هەڵبژاردنی سەرۆکوەزیرانی نوێ دیار دەکات

ئاڤا نیوز

ئیئتیلافی دەوڵەتی یاسا، مەرجەکانی هەڵبژاردنی سەرۆکوەزیرانی نوێ دیار دەکات و  جەخت لەوە دەکاتەوە سەرۆکوەزیرانی نوێ دەبێت خاوەنی گیانی هاوبەشی بێت بۆ ڕووبەڕووبوونەوەی مەترسییە دەرەکییەکان و سەرچاوە و تواناکانی دەوڵەت بۆ بەرژەوەندی لیستەکەی بەکارنەهێنێت.

وێنە گەورەکە: بڕیارە 11ـی 11ـی ئەمساڵ هەڵبژاردنی خولی شەشەمی پەرلەمانی عێراق بەڕێوەبچێت، چاوەڕوان دەکرێت ڕکابەرییەکی تووند لە نێوان لایەنە سیاسییەکان هەبێت و گۆڕانکاریش لە نەخشەی سیاسیی ئێستای عێراق ڕووبدات.

بڵاوکراوەی فەرمی: یاسر مالیکی، سەرۆکی فراکسیۆنی دەوڵەتی یاسا لە پەرلەمان، لە لە بڵاوکراوەیەک لە تۆڕی ئێکس ڕایگەیاند: "وڵاتەکەمان ڕووبەڕووی ئاڵنگاری و مەترسی گەورە بووەتەوە کە پەیوەندی بە ئاسایشی نەتەوەیی و سەقامگیری و خۆشگوزەرانییەوە هەیە، بەتایبەت دوای ئەو ململانێیەی ناوچەکە بەخۆیەوە دەبینێت. ئەمەش شتێکی شاراوە نییە و هەموومان ناچار دەکات گرنگییەکی زۆر بە بەرژەوەندییە باڵاکان بدەین و بە دیدگایەکی هاوبەشەوە کار بکەین بۆ زاڵبوون بەسەر ئەم ئاڵنگاری و مەترسییە نزیکانەدا."

زانیاریی زیاتر: بە گوتەی مالیکی، پێویستە سەرۆکوەزیرانی نوێ خاوەنی گیانی هاوبەشی و کاری بەکۆمەڵ بێت بۆ ڕووبەڕووبوونەوەی مەترسییە دەرەکییەکان، لە بەرامبەردا دەسەڵاتی پێویستی پێبدرێت بۆ هەڵبژاردنی ئەندامانی حکومەتەکەی و پاڵپشتیکردنی پڕۆگرام و چاکسازییەکانی، بەو مەرجەی لایەنێک نەبێت لە گۆڕەپانی کێبڕکێی هەڵبژاردندا، بۆ ئەوەی سەرچاوە و تواناکانی دەوڵەت بۆ بەرژەوەندی لیستەکەی بەکارنەهێنێت، بەمەش کات و سەرچاوەی پێویستمان لەدەست دەچێت بۆ چاکسازی سیستەمی سیاسی و ڕووبەڕووبوونەوەی ئاڵنگارییە دەرەکییەکان و پێشکەشکردنی خزمەتگوزارییە شایستەکان بە گەلە بەڕێزەکەمان.