جووتسایدێکی دیکە لە قەزای شێخان دروست دەکرێت

ئاڤا نیوز

ئەمڕۆ جووتسایدی شێخان - لالش کرایەوە و لە مەراسیمی کردنەوەی ئەو پڕۆژەیە موژدەی دروست کردنی جووتسایدێکی دیکە لە قەزاکە ڕاگەیێنرا.

چیرۆکی سەرەکی: پڕۆژەی جووتسایدی بەیەکتر بەستنەوەی هەردوو ڕێگای دهۆک - باعەدرێ و شێخان - لالش، ڕەزامەندی سەرۆکوەزیرانی بۆ وەرگیراوە، ئێستا پڕۆژەکە لە قۆناغی دیزاینە و لە داهاتووێکی نزیک دەکەوێتە بواری جێبەجێکردن.

لێدوانی فەرمی: عەلی تەتەر پارێزگاری دهۆک، بە ئاڤای گوت: سەرۆکوەزیران مەسرور بارزانی ڕەزامەندی داوە لەسەر جێبەجێ کردنی جووتسایدێکی نوێ لە قەزای شێخان، ئەویش ڕێگای بەیەکتر بەستنەوەی هەردوو ڕێگای دهۆک - باعەدرێ و شێخان - لالشە.

لەلایەکی دیکەوە: خەدیجە محەممەد، بەڕێوەبەری ڕێگاوبانی دهۆک بە ئاڤای گوت: گوژمەی پڕۆژەکە 15 ملیار و 498 ملیۆن دینارە و درێژیەکەی هەشت کیلۆمەتر و 700 مەترە، پانییەکەی 25 مەتر و نیوە ، ڕێگاکە دوو سایدە و هەر سایدێکی هەشت مەتر و نیوە و دوو ڕێڕەوی ئۆتۆمبێلی هەیە، هاوشێوەی جووتسایدی شێخان - لالش هەموو بڕگەکانی دیکەی ڕێگای ستانداردی لەخۆگرتووە.

بۆچی گرنگە: بە گوتەی سەردار شێخ یەحیا، قایمقامی قەزای شێخان، بە تەواو بوونی ئەم ڕێگایە 35 کیلۆمەتر ڕێگای هاونیشتمانیان لە نێوان دهۆک و (ناحیەی ئەتروش، ناحیەی قەسرۆک ، سەنتەری قەزای شێخان و گوندەکانی ئەم سنوورە) کەمدەکاتەوە، بۆ دانیشتووانی ناحیەی باعەدرێ و گوندەکانی سەر بە ناحیەکە لە هاتووچۆکردنیان بۆ قەزای شێخان ئاسانکاری زۆر دەکات و ڕێگەیان نزیک دەکاتەوە.

ڕێگاکە بۆ جووتیارانی ئەم دەڤەرەش لە بەبازاڕکردنی بەروبوومەکانیان لە دهۆک سوودی زۆری دەبێت.

گۆشەیەکی دیکەی دیمەنەکە: ئەم ڕێگەیە، دهۆک بە هەردوو شوێنەواری لالش و خنس دەبەستێتەوە و ئاسانکاری زۆر بۆ گەشتیاران دەکات لە سەردانی کردنی شوێنەوارەکانی سنووری قەزای شێخان.

زانیاریی زیاتر: ئەم جووتسایدە دەبێتە هۆی کەمکردنەوەی قەرەباڵغی رێگای شێخان - ناحیەی ئەلقوش، چونکە هاونیشتمانیان لە هاتووچۆکردنیان لە نێوان دهۆک و شێخانەوە هیچی دیکە ڕێگای شێخان - ئەلقوش بەکارناهێنن.