بەشەخۆراکی ئەوانە ڕادەگیرێت کە مووچەکانیان لە ملیۆن و 500 هەزار  دینار زیاترە؟

ئاڤا نیوز

وەزارەتی بازرگانی عێراق دەڵێت، ئێستا بەهۆی فۆرمی ئەلیکترۆنی بەشەخۆراکەوە ئاماری وردی سوودمەندبووانی بەشەخۆراکیان هەیە، پێشنیازێکیش هەیە بەشەخۆراکی ئەو فەرمانبەرانەی حکومەت ڕابگیرێت کە مووچەکانیان لە ملیۆن و 500 هەزار  دینار زیاترە.

وێنە گەورەکە: سەرەتای ئەم مانگە ئەنجوومەنی وەزاری عێراق بۆ کاروباری ئابووری ڕایگەیاند، بڕیار دراوە لە کۆتایی ئەمساڵەوە بەشەخۆراکی ئەو فەرمانبەر و خانەنشینانە ڕابگێرێت کە مووچەکانیان لە  ملیۆن و 500 هەزار دینار زیاترە، واتە بەشەخۆراکی خۆیان و سەرجەم ئەندامانی خێزانەکانیان، ئەم بڕیارە خاوەن کۆمپانیاکان و بەڵێندەرانیش دەگرێتەوە.

لێدوانی فەرمی: ئەسیر داود غەریری، وەزیری بازرگانی عێراق بە ئاژانسی هەواڵی فەرمی ڕاگەیاندووە، لەم کاتەدا تەنیا بەشە خۆراکی ئەوانە ڕاگیراوە کە مووچەکانیان دوو ملیۆن دینارە، بەڵام ئێستا پێشنیازێک هەیە کە ئەم بڕیارە بگۆڕدرێت و بەشەخۆراکی هەموو ئەو فەرمانبەرانە ڕابگیرێت کە مووچەکانیان لەملیۆن و 500 هەزار  دینار زیاترە، ئەم پێشنیازەش نەخراوەتە بەردەم ئەنجوومەنی وەزیران، ئەگەر حکومەتیش پەسەندی بکات پێش ساڵی داهاتوو دەست بە جێبەجێکردنی ناکرێت.

لەلایەکی دیکەوە: بە گوتەی وەزیری بازرگانی، دابەشکردنی بەشەخۆراک بە هەمان بڕ و ڕێکاری پێشوو بەردەوامە، پرۆسەی نوێکردنەوەی فۆرمی خۆراکیش بە ڕێگەی ئەلیکترۆنی بەردەوامە و بەهۆیەوە ئاماری وردی ژمارەی مردووان و ئەوانەی کۆچیان کردووە یان داهاتیان بەرزە، وەردەگرن و لەسەر بنەمای ئەو ئامارانە بڕیار و ڕێکاری پێویست دەگرنەبەر.