زێلینسکی پەیامێکی بەپەلە ئاراستەی هاوپەیمانانی کیێڤ دەکات

ئاڤا نیوز

سەرۆکی ئۆکراینا لە پەیامێکی بەپەلەدا بۆ هاوپەیمانانی وڵاتەکەی داوای دابینکردنی دەستبەجێی سیستەمی بەرگری ئاسمانی زیاتر بۆ ئۆکراینا دەکات.

چیرۆکی سەرەکی: دوای ئەوەی سوپای ڕووسیا ئۆپەراسیۆنێکی تایبەتی لەسەرجەم بەرەکانی جەنگ بەرەو ئاراستەی خاکی ئۆکراینا ڕاگەیاند، لە ماوەی دوو ڕۆژی ڕابردوودا سوپای ڕووسیا بە ڕێگەی ئاسمانی و زەمینی بەردەوام بووە لە هێرشکردنە سەر ئۆکراینا، بۆ ڕاگرتنی ئەم ئاستە نوێیەی هێرشی ڕووسیا سەرۆکی ئۆکراینا و بەرپرسانی باڵای سەربازی ئەو وڵاتە داوای بەهاناوەچوون و دابینکردنی دەستبەجێی سیستەمی بەرگری ئاسمانی زیاتر لە دەوڵەتانی هاوپەیمانی کیێڤ دەکەن.

بڵاوکراوەی فەرمی: ڤۆلۆدیمێر زێلینسکی، سەرۆکی ئۆکراینا لە تۆڕە کۆمەڵایەتییەکان پەیامێکی ئاراستەی وڵاتانی ناتۆ  کردووە و ڕایگەیاندووە، ئەمانجە سەربازییەکانی چەند ڕۆژی ڕابردووی ڕووسیا ستراتیژییەتێکی سەربازی نییە، بەڵکو ئامانجی ترساندنی گەلی ئۆکراینا و لە ناوبردنی دامەزراوەکانی دەوڵەتە، بۆیە دەبێت دەستبەجێ وڵاتانی هاوپەیمانی کیێڤ سیستەمی بەرگری ئاسمانی زیاتر دابین بکەن و سزای قورستر بە سەر ڕووسیادا بسەپێنن.

لەلایەکی دیکەوە: سێرگی لیساک، سەرۆکی دامەزراوەی سەربازی ناوخۆی ئۆکراینا هێرشی چڕی ڕووسیای بۆسەر ناوچە سنوورییەکانی ئۆکراینا پشتڕاست کردەوە و ڕایگەیاند، بە هۆی هێرشە ئاسمانییەکانەوە ژمارەیەکی زۆر لە دامەزراوەکانی دەوڵەت و باڵەخانەی کۆمپانیاکان وێران کراون.