مۆزەخانەی شێرکۆ بێکەس لە سلێمانی کرایەوە

ئاڤا نیوز

لە شاری سلێمانی مۆزەخانەی شاعیری کۆچکردووی کورد شێرکۆ بێکەس کرایەوە، وەک ناوەندێکی ڕۆشنبیری و ئەدەبی، مۆزەخانەکە لە چەند بەشێک پێکهاتووە و دەبێتە شوێنێک بۆ کۆبوونەوەی ئەدەبدۆستان.

چیرۆکی سەرەکی: ئەمڕۆ لە شاری سلێمانی، مەراسیمێکی شایستە بۆ کردنەوەی مۆزەخانەی شێرکۆ بێکەس، شاعیری گەورەی کورد، بەڕێوەچوو. ئەم مۆزەخانەیە کە مەڵبەندێکی نوێی ڕۆشنبیری و ئەدەبییە، بەشێوەیەک دیزاین کراوە تا بتوانێت خزمەتێکی گەورە بە یاد و بەرهەمەکانی شێرکۆ بێکەس بکات و ببێتە شوێنێک بۆ کۆبوونەوەی ئەدەبدۆستان.

زانیاریی زیاتر: مۆزەخانەکە لە دوو بەشی سەرەکی پێکدێت. بەشێکیان کۆفی شۆپێک و کتێبخانەیەک لەخۆدەگرێت، هاوکات هۆڵێکیش تەرخان کراوە بۆ نمایشکردنی ژیاننامە و وێستگە گرنگەکانی ژیانی شاعیر.

لە نهۆمی سەرەوەی مۆزەخانەکەدا، ژوورێکی نێودەوڵەتی تایبەت بە وەرگێڕانی کتێب و بەرهەمەکانی شێرکۆ بێکەس دروست کراوە، کە تیایدا کار لەسەر وەرگێڕانی بەرهەمەکانی بۆ سەر زمانە زیندووەکانی جیهان دەکرێت. ئەمەش هەنگاوێکی گرنگە بۆ ناساندنی شیعری کوردی بە گشتی و بەرهەمەکانی شێرکۆ بێکەس بە تایبەتی بە جیهان.

هەروەها لە مۆزەخانەکەدا بەشێکی تایبەت کراوە بە نمایشکردنی سەرجەم دیوان و بەرهەمە چاپکراوەکانی شێرکۆ بێکەس، کە دەرفەت دەدات بە خوێنەران و توێژەران بە ئاسانی دەستیان بە کارەکانی بگات. جگە لەوانەش، هۆڵێکی تایبەت بە بۆنەکان دروست کراوە بۆ ئەنجامدانی بۆنە گرنگ و چالاکییە ڕۆشنبیرییەکانی شاری سلێمانی.

ئەوەی پێویستە بیزانیت: مۆزەخانەی شێرکۆ بێکەس لە ڕۆژانی شەممە، سێشەممە، چوارشەممە و پێنجشەممە، لە کاتژمێر 10ـی بەیانی تا 3ـی پاشنیوەڕۆ کراوە دەبێت و بەبێ بەرامبەر پێشوازی لە ئاشقانی شیعر و بەرهەمەکانی شێرکۆ بێکەس دەکات. بڕیارە بەردەوام کۆڕ، یاد، ناساندنی کتێب و چالاکییە ڕۆشنبیرییە جیاوازەکان لەم مۆزەخانەیەدا بەڕێوەبچن.