وەزیری ناوخۆی عێراق لە کەرکووکە

ئاڤا نیوز

وەزیری ناوخۆی عێراق بە سەردانێک لە پارێزگای کەرکووکە و لەگەڵ بەرپرسانی شارەکە و ئەفسەرانی وەزارەتی ناوخۆ بۆ تاوتوێکردنی دۆخی ئەمنیی و چۆنییەتی بەڕێوەچوونی کاروبارەکان کۆدەبێتەوە.

وێنە گەورەکە: پارێزگاکانی کەرکووک، سەڵاحەددین، دیالە و نەینەوا بەهۆی هەمەجۆری پێکهاتەیی و ناجێگری دۆخی ئەمنیی لە بەشێکی ناوچەکانیاندا، لەلایەن وەزارەتی ناوخۆ و فەرماندەیی ئۆپەراسیۆنە هاوبەشەکان سەرنجێکی زیاتریان بەراورد بە پارێزگاکانی دیکە لەسەرە، بۆیەش ناوەناوە فەرماندە ئەمنییەکانی عێراق سەردانی ئەو پارێزگایانە دەکەن.

زانیاریی پەیامنێر: دیار محەممەد، پەیامنێری ئاڤا لە کەرکووک ڕایگەیاند، سەرلەبەیانی ئەمڕۆ یەکشەممە عەبدولئەمیر شەممەری، وەزیری ناوخۆی عێراق سەردانی کەرکووکی کرد و لەگەڵ پارێزگار، ئەنجوومەنی پارێزگا و چەند لایەنێکی دیکە کۆدەبێتەوە.

دوێنێش وەزیری ناوخۆی عێراق لە پارێزگای سەڵاحەددین و دیالەی هاوسێی کەرکووک بوو و لەگەڵ فەرماندە باڵاکان و ئەفسەرانی وەزارەتەکەی لەو پارێزگایانە کۆبووەوە، بەگوێرەی نووسینگەی وەزیریش لە کۆبوونەوەکاندا دۆخی ئەمنیی و چۆنییەتی بەڕێوەچوونی کاروباری فەرمانگەکانی وەزارەتی ناوخۆ لەو پارێزگایانەی تاوتوێ کردووە.