نزیکەی 430 هەزار قوتابی بەشداری پرۆسەی ساڵی نوێی خوێندن لە سلێمانی دەکەن

ئاڤا نیوز

بەڕێوەبەری گشتیی پەروەردەی سلێمانی دەڵێت، هەموو ئامادەکارییەکان بۆ دەستپێکردنی خوێندن جێبەجێکراون و ئەمساڵ چوار باڵەخانەی نوێ خوێندن لە سنووری پارێزگای سلێمانی دروستکراون.

چیرۆکی سەرەکی:  وەزارەتی پەروەردەی حکومەتی هەرێمی کوردستان ڕۆژی 21-9-2025ـی وەک دەستپێکی ساڵی خوێندنی (2026-2025) دیاریکرد، بۆ قوتابخانە حکومییەکان و ئەو قوتابخانە ناحکومییانەی بە سیستمی وەزارەتی پەروەردە دەخوێنن. یەک ملیۆن و 950 هەزار قوتابی لە سەرتاسەری هەرێمی کوردستان بەشداری پرۆسەکە دەکەن.

لێدوانی فەرمی: نەژاد عەبدوڵڵا، بەڕێوەبەری گشتیی پەروەردەی سلێمانی بە ئاڤای گوت، "لە سنووری پارێزگای سلێمانی 429 هەزار و 582 قوتابی ڕوو لە هەزار و 400 ناوەندی خوێندن دەکەن، لەلایەن 42 هەزار و 56 مامۆستا و فەرمانبەر سەرپەرشتیی پرۆسەکە دەکرێت."

زانیاریی زیاتر: لەبەشێکی دیکەی قسەکانیدا بەڕێوەبەری گشتیی پەروەردەی سلێمانی ئاماژەی بەوەدا، لەگەڵ ئەوەی چوار باڵەخانەی نوێی خوێندن لە سنووری پارێزگای سلێمانی دروستکراون و 108 ناوەند پێویستیان بە نۆژەنکردنەوە هەیە و دەرخستەیان بۆ کراوە.