وەزارەتی ئەوقاف ئامادەکاری بۆ پرۆسەی حەج دەستپێدەکات

ئاڤا نیوز

وەزارەتی ئەوقاف و کاروباری ئایینیی هەرێمی کوردستان وەک ئامادەکارییەک بۆ پرۆسەی حەجی ساڵی داهاتوو، شاندێک ڕەوانەی سعوودیە دەکات و چاودێری شوێنی مانەوە و ئەو خواردنانەی کە بۆ حاجییان ئامادە دەکرێت، دەکات.

وێنە گەورەکە: حکومەتی هەرێمی کوردستان ساڵانە بەشێوەیەکی چڕ و پڕ دەست بە ئامادەکارییەکانی وەرزی حەج و عومرە دەکات و ئەمساڵیش بۆ یەکەم جار لەسەر ئاستی کوردستان لەلایەن وەزیری ئەوقاف و کاروباری ئایینی، بە هەماهەنگی لەگەڵ فەرمانگەی تەکنەلۆجیای زانیاری دەروازەی حەج ڕاگەیێنرا کە تایبەتە بە ناونووسینی حاجیان بە شێوەی ئەلیکترۆنی.

چیرۆکی سەرەکی: ئەمڕۆ یەکشەممە 21-9-2025، وەزارەتی ئەوقاف و کاروباری ئایینی بڵاویکردەوە، بەمەبەستی پێشکەشکردنی باشترین خزمەتگوزاری بە حاجیانی کوردستان و ئامادەکارییەکان بۆ دەستپێکردنی پرۆسەی حەجی ساڵی داهاتوو، شاندێک دەچێتە سعوودیە.

لێدوانی فەرمی: کاروان ستوونی، وتەبێژی حەج و عومرەی کوردستان بە ئاڤا میدیای ڕاگەیاند، لەسەر ڕاسپاردەی د. پشتیوان صادق، وەزیری ئەوقاف و کاروباری ئایینی و بە ڕەزامەندی ئەنجوومەنی وەزیرانی حکومەتی هەرێمی کوردستان لیژنەیەک لە بەڕێوەبەرایەتیی گشتیی حەج و عومرەی کوردستان هاوشان لەگەڵ دەستەی باڵای حەج و عومرەی عێراق سەردانی سعوودیە دەکەن بۆ بەدواداچوون لەو هۆتێلانەی کە ساڵی داهاتوو لە شاری مەدینە بۆ حاجییانی کوردستان و عێراق دەستنیشانکراون. هەروەها چاودێریکردنی ئەو خواردنەی کە بۆ حاجییان ئامادە دەکرێت.

بە وتەی کاروان ستوونی، سبەی دووشەممە 22-9-2025 شاندەکە بەرەو شاری مەدینە بەڕێ دەکەون و  ئامادەکاری دەکەن بۆ دەستپێکردنی پرۆسەی حەجی ساڵی داهاتوو 2026.

ئەوەی پێویستە بیزانیت: کاروان ستوونی، وتەبێژی حەج و عومرەی کوردستان و بەڕێوەبەری ڕاگەیاندن و پەیوەندییەکان لە بەرێوەبەرایەتیی گشتیی حەج و عومرەی کوردستان، هاوکات سیروان عەبدولڕەحمان، نوێنەری بەڕێوەبەرایەتییەکە لە دەستەی باڵای حەج و عومرەی عێراق هاوشانی دەستەی باڵای حەج و عومرەی عێراق دەستنیشانکراون کە سەردانی سعوودیە بکەن.