ئەحمەد شەرع داوایەک لە سوورییەکانی نیشتەجێی ئەمریکا دەکات

ئاڤا نیوز

ئەحمەد شەرع، داوا لە سوورییەکان دەکا سەرەڕای جیاوازییەکانیان یەکڕیز بن و جەخت لەوە دەکاتەوە، جیهان ئێستا دەرفەتێکیان پێدەدات بۆ سەلماندنی توانایان بۆ دووبارە هەستانەوە.

چیرۆکی سەرەکی: ڕۆژی یەکشەممە، ئەحمەد شەرع، بە مەبەستی بەشداریکردن لە کۆبوونەوەکانی کۆمەڵەی گشتی نەتەوەیەکگرتووەکان گەیشتە شاری نیویۆرک، دوای گەیشتنیشی لەگەڵ شاندێکی ڕەوەندی سووری لە ئەمریکا کۆبووەوە.

بڵاوکراوەی فەرمی: بەگوێرەی ئاژانسی فەرمی سووریا، ئەحمەد شەرع بە ڕەوەندی سووری وتوە، "دەبێت گەلێکی یەکگرتوو بین، ڕەنگە لە هەموو شتێکدا ڕێک نەکەوین، بەڵام دەبێت یەکبگرین، گەلانی جیهان سەرسام ماون بە ڕووداوەکانی سووریا و دەبێت سوورییەکان هەموو ڕۆژێک بە دەستکەوتێکی نوێ کە جیهان سەرسام بکات، خۆیان بسەلمێنن".

سەرۆککۆماری سووریا ئەمانەشی وتووە:

٠ سووریا توانای ئەوەی هەیە جارێکی دیکە ببێتەوە بە بووکی ڕۆژهەڵاتی ناوەڕاست، ئاماژەی بەوەش کرد ئەوەی سوورییەکان پێویستیان پێیەتی، پلانێکی دروست و یەکڕیزییە بۆ دووبارە بونیادنانەوەی وڵاتەکە کە لێی بێبەش کراون.

٠ قەبارەی زیانەکان لە هەموو سێکتەرەکاندا گەورەیە، سووریا سەرمایەیەکی گەورە و سەرچاوەیەکی مرۆیی فراوانی هەیە، دەتوانێت بەهۆیەوە هەستێتەوە و دووبارە ئاوەدان بکرێتەوە، بە مەرجێک یەکڕیزی و پلانێکی ڕوون هەبێت.

ئەوەی پێویستە بیزانیت: ئەمە یەکەم بەشداریکردنی سەرۆکێکی سوورییە کە لە ماوەی زیاتر لە نیو سەدەدا وتارێک لەبەردەم کۆمەڵەی گشتی نەتەوەیەکگرتووەکان پێشکەش بکات.