چەکی پارەی گەنمی جووتیاران گەیشت و دەست بە دابەشکردنی دەکرێت

ئاڤا نیوز

بەشی یەکەمی پارەی گەنمی جووتیارانی هەرێمی کوردستان دابەش دەکرێت، ئەو جووتیارانەی لە قۆناغی یەکەم گەنمەکانیان ڕادەست کردووە، شایستە داراییەکانیان خەرج دەکرێت.

چیرۆکی سەرەکی: نزیکەی سێ مانگە جووتیاران گەنمەکانیان ڕادەستی سایلۆکان کردووە، لەبەشێکی پارێزگاکانی عێراق شایستە داراییەکانیان خەرج کراوە، بەڵام ئەوانەی هەرێمی کوردستان تاوەکو ئێستا خەرجنەکراوە و پشکی هەرێمی کوردستان 310 بۆ 315 ملیار دینارە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "چەکی پارەی جووتیاران گەیشتووەتە دەستمان، ئێستا دەستمان بە ڕێکارە کارگێڕییەکان کردووە، کۆتایی ئەم هەفتەیە یان سەرەتای هەفتەی داهاتوو جووتیاران لەڕێگەی سایلۆکانەوە شایستە داراییەکانیان وەردەگرن."

ئەمەش بزانە: لەم قۆناغەدا پشکی هەرێمی کوردستان 57 ملیار دینارە، 20 ملیار بۆ هەولێر، 25 ملیار بۆ سلێمانی و هەڵەبجە و 12 ملیار دیناریش بۆ جووتیارانی دهۆک تەرخانکراوە.