واشنتن یەکەم هەڵوێستی سەبارەت بە دان نان بە دەوڵەتی فەڵەستین ڕاگەیاند

ئاڤا نیوز

ئەمریکا یەکەم لێدوانی خۆی لەبارەی دان نان بە دەوڵەتی فەڵەستین ئاشكرا دەکات و وەک ''شانۆگەریی'' ناوی دەبات.

وێنە گەورەکە: وڵاتانی جیهان، دوو دەوڵەتی بۆ چارەسەرکردنی کێشەکانی نێوان ئیسرائیل و فەڵەستین دەزانن، بۆ ئەو مەبەستەش چەند وڵاتێک دانیان نا بە دەوڵەتی فەڵەستین.

زانیاریی بەدەستهاتوو: وتەبێژی وەزارەتی دەرەوەی ئەمریکا ڕایگەیاند، ''ئێمە سەرنجمان لەسەر دیپلۆماسی جددی دەمێنێتەوە نەک (ئاماژەی نمایشکارانە) کاری لە پێشینەمان ڕوونە لەوانەش ئازادکردنی سەرجەم بارمتەکان، ئاسایشی ئیسرائیل، و ئارامی و خۆشگوزەرانی بۆ تەواوی ناوچەکە ئەمەش لە ڕێگەی نەمانی حەماس بەدەست دەهێندرێت".

ئەوەی ئێستا ڕوودەدات: سعوودیە و فەرەنسا هاوسەرۆکایەتیی یەکێک لە کۆبوونەوەکانی نەتەوەیەکگرتووەکان تایبەت بە چارەسەری دوو دەوڵەتی بۆ ئیسرائیل و فەڵەستین دەکەن، هاوکات پێشبینی دەکرێت کۆبوونەوەیەدا چەندین وڵات بە فەرمی دان بە دەوڵەتی فەڵەستیندا بنێن.