یەک یەکەی ژمێریاری بۆ سەرجەم هێزەکانی پێشمەرگە دروست دەکرێت

ئاڤا نیوز

لەچوارچێوەی پرۆسەی چاکسازی و یەکخستنەوەی هێزی پێشمەرگەدا، بڕیار درا بە دروستکردن و تەواوکردنی یەک یەکەی ژمێریاریی سەربازیی یەکگرتوو بۆ سەرجەم هێزەکانی پێشمەرگە.

چیرۆکی سەرەکی: ئەمڕۆ 22-9-2025، لە دیوانی وەزارەتی پێشمەرگە، بە ئامادەبوونی شۆڕش ئیسماعیل، وەزیری پێشمەرگە و فەوزی هەریری، سەرۆکی دیوانی سەرۆکایەتیی هەرێمی کوردستان و ئومێد سەباح، سەرۆکی دیوانی ئەنجوومەنی وەزیران، ئامانج ڕەحیم، سکرتێری ئەنجوومەنی وەزیران، ئاوات شێخ جەناب، وەزیری دارایی و ئابوری، نوێنەری هاوپەیمانان و ژمارەیەک بەرپرس و ئەفسەری پلەباڵای وەزارەتی پێشمەرگە، دوایین هەنگاوەکانی پرۆسەی چاکسازی و جێبەجێکردنی خاڵەکان و ئاستەنگەکانی پرۆسەکە و ڕێنماییە ژمێرکارییەکان گفتوگۆیان لەبارەوە کرا.

ڕاگەیێنراوی فەرمی: وەزارەتی پێشمەرگە ڕایگەیاند، لە چوارچێوەی کۆبوونەوەکەدا، بریاردرا بەجێبەجێکردنی خاڵێکی گرنگی پرۆسەی چاکسازی کە لە دروستکردن و تەواوکردنی یەک یەکەی ژمێریاریی سەربازیی یەکگرتوو بۆ سەرجەم هێزەکانی پێشمەرگە لەژێر چەتری وەزارەتی پێشمەرگەدا خۆی دەبینێتەوە، ئەمەش هەنگاوێکە بۆ نزیکبوونەوە لەدوا قۆناخەکانی چاکسازی.

لە کۆبوونەوەکەدا، تیشکخرایە سەر تەواوکاری کارەکانی دامەزراندن و تواناکانی دەڤەری یەک و دوو، هەروەها دابینکردنی پێداویستییەکان و خێراترکردنی هەنگاوەکان بۆ دامەزراندنیان و ڕێکخستنەوە و یەکخستنەوەی هێزی پێشمەرگە، ئەمەش هەنگاوێکی مێژوویی بوو، بۆ سەرەتای دروستبوونی هێزێکی یەکگرتووی کوردستانی.

ئەوەی پێویستە بیزانیت: لە ساڵی 2022 لێکتێگەیشتنێک لەنێوان حکومەتی هەرێمی کوردستان و پنتاگۆن بۆ یەکگرتنەوەی هێزەکانی پێشمەرگە کراوە، هەروەها کات و میکانیزمی جێبەجێکردنیشی بۆ دانراوە، بەگوێرەی ئەو لێکتێگەیشتنە دەبێت تاوەکو مانگی 10ی ساڵی 2026 یەکخستنەوەی هێزەکانی پێشمەرگە کۆتایی بێت و هەموو هێزەکان بخرێنە ژێر چەتری وەزارەتی پێشمەرگە.