وەزارەتی پێشمەرگە: هەر ئەفسەرێک پایەی نەبێت پلەی بەرز ناکرێتەوە

ئاڤا نیوز

بەڕێوەبەری گشتیی ڕاگەیاندن و هۆشیاری لە وەزارەتی پێشمەرگە دووپاتی دەکاتەوە پلە بەرز کردنەوە ڕانەگیراوە، بەڵام ئەو ئەفسەرانەی پایەیان نەبێت و مەرجەکان نەیانگرێتەوە پلەیان بەرز ناکرێتەوە.

چیرۆکی سەرەکی: چەند سالێکە بەرزکردنەوەی پلەی ئەسەران دواکەوتووە، وەزارەتی پێشمەرگەش ئاماژە بۆ ئەوە دەکات بە چەند خشتەیەک کار لە پلە بەرزکردنەوەی ئەفسەران دەکرێت.

لێدوانی فەرمی: لیوا عوسمان محەممەد، بەڕێوەبەری گشتیی ڕاگەیاندن و هۆشیاری لە وەزارەتی پێشمەرگە لە بەرنامەی مۆری ئاڤا گوتی : بەهیچ جۆرێک پلە بەرزکردنەوە ڕانەگیراوە و بەچەند خشتەیەک پلەبەرزکردنەوەی پێشمەرگە و ئەفسەران بەردەوامە، بەمجۆرە:

- پلەی پێشمەرگە تا دەگاتە ئەفسەر : بەپێی خشتەی ساڵ (خشتەی نەورۆز و خشتەی ئەیلوول) وەکو خۆی ڕۆیشتووە، ئەو کەسانەی فۆرمیان هاتبێت بەپێ فەرمانی وەزاری ساڵانە شایستەیی خۆیان بۆ گەڕاوەتەوە و پلەیان بەرز کراوەتەوە.

- پلە بەرزکردنەوەی ئەفسەران: چەند مەرجێکە هەیە، پایە و ساڵانی خزمەتی مەرجی سەرکین و هەر ئەفسەرێک لە پلەی ڕائید بە سەرەوە ئەگەر پایەی نەبێت پلەی بەرز ناکرێتەوە.

 زانیاریی زیاتر: بە گوتی لیوا عوسمان محەممەد، چەند خشتەیەکی پلە بەرز کردنەوەی ئەفسەران لە ئەنجوومەنی وەزیرانە چاوەڕوان دەکرێت بەمزووانە بگەرێتەوە، دوای ئەوانیش خشتەی دیکە ئامادە دەکرێن و هیچ خشتەیەک ڕانەگیراوە بەڵکو هەندێک گرفتی تەکنیکیی هەبووە لەناو ئەو خشتانەی دواکەوتوون و هەندێک لە ئەفسەران بەپێی مەرجەکان شایستەی پلە بەرز کردنەوە نین.