ڕاگەیێنراوی بارەگای بارزانی لەبارەی کوژرانی ئەکبەری حاجی ڕۆستەم

ئاڤا نیوز

 

بارەگای بارزانی لەبارەی کوژرانی ئەکبەری حاجی ڕۆستەم داوا لە دامودەزگاکانی دەڤەری گەرمیان دەکات تاوانباران بدۆزنەوە و ڕادەستی یاسا بكەن و بە سزای تاوانی خۆیان بگەیێندرێن.

 

چیرۆکی سەرەکی: شەوی ڕابردوو ڕێککەوتی 22ـی 9ـی 2025، ئەکبەر حاجی ڕۆستەم، یەکێک لە کەسایەتییە دیارەکانی سنووری گەرمیان لەناو باخەکەی لە گوندی ئۆمەربلی کفری کوژرا. 

 

لێدوانی فەرمی: بارەگای بارزانی لە ڕاگەیێنراوێکدا لەبارەی ڕووداوەکە دەڵێت، "بە داخێکی زۆرەوە هەواڵی شەهیدکردنی فەرماندەی پێشمەرگە و كەسایەتیی خەباتگێڕ (ئەكبەر حاجی ڕۆستەم)ـمان پێ گەییشت. ئەكبەر حاجی ڕۆستەم تێكۆشەر و نیشتیمانپەروەری ناسراوی دەڤەری گەرمیان و جێی ڕێزی خەڵكی كوردستان بوو و لەدەست دانی خەسارەت و كەلێنێكی گەورەیە.

 

بارەگای بارزانی دەڵێت، "پێویستە بە زووترین كات دامودەزگاکانی دەڤەری گەرمیان تاوانباران بدۆزنەوە و ڕادەستی یاسا بكەن و بە سزای تاوانی خۆیان بگەیێندرێن".

 

لەلایەکی دیکە: لە بەشێکی دیکەی ڕاگەیێنراوەکەدا هاتووە، "بەم بۆنە خەمناكەوە پرسە و هاوخەمیی خۆمان ئاراستەی خانەوادە و كەسوكار و هاوڕێ و ئاشنایانی خوالێخۆشبوو ئەكبەر حاجی ڕۆستەم و خەڵكی گەرمیان دەكەین و خۆمان بە هاوبەشی خەمیان دەزانین. لە خودای گەورە داواكارین ڕۆحی خوالێخۆشبوو بە بەهەشتی بەرین شاد بكات و سەبر و ئارامی بە هەموو لایەك ببەخشێت.