کۆمیسیۆن: سبەی پرۆسەی دابەشکردنی کارتی دەنگدەران دەست پێ دەکات

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایدەگەیێنێت، پشکنینی کارتەکانی دەنگدان لە سەرجەم نووسینگەکانی هەڵبژاردن لە پارێزگاکانی عێراق بە سەرکەوتوویی تەواو کراوە. ئەم پڕۆسەیە دوای پێکهێنانی لیژنەی تایبەت بۆ دڵنیابوون لە وردبینی و تەواوێتی داتاکان ئەنجام درا.

 

وێنە گەورەکە: بڕیارە 11-11-2025، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، کۆمیسیۆنیشی لە ئامادەکارییەکانی بەردەوامە.

 

ڕاگەیێنراوی فەرمی: لە ڕاگەیەندراوێکدا، کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، سبەی چوارشەممە، پرۆسەی دابەش کردنی کارتی دەنگدەران دەست پێ دەکات. ئەمە یەکەم قۆناغی دابەش کردن دەبێت و ژمارەیەکی بەرچاو لە کارتەکانی دەنگدان دەگرێتەوە.

 

ژمارەکان وادەڵێن:

•  دەنگدانی گشتی دوو ملیۆن و 425 هەزار و 516 کارت.
• دەنگدانی تایبەت 44 هەزار و 787 کارت (ئەندامانی هێزە ئەمنییەکان و پێشمەرگە و هێزەکانی دیکەی ناوخۆ دەگرێتەوە)
•   ئاوارەکان 758 کارت.

 

لەلایەکی دیکەوە: کۆمیسیۆن ڕوونیشیکردەوە، ئەم وه‌جبه‌ی یه‌که‌مە سەرجەم پارێزگاکانی عێراق دەگرێتەوە و دابەشکردنەکە لەڕێگەی بنکەکانی تۆمارکردنەوە دەبێت. هاوکات، تیمە گەڕۆکەکانیش دەنێردرێنە ناوچە جیاوازەکان بۆ گەیاندنی کارتەکانی دەنگدەران بە شێوەیەکی ئاسان و خێراتر.