لە سلێمانی هەزار قوتوو سریلاکی ماوەبەسەرچوو دەستی بەسەردا دەگیرێت

ئاڤا نیوز

 

لیژنە هاوبەشەکانی قایمقامیەتیی سلێمانی دەڵێت، دەستیان بەسەر نزیکەی هەزار قوتوو (997 پاکەت و قوتوو) سریلاکی منداڵانی ماوەبەسەرچوودا گرتووە، کە بازرگانێک ویستوویەتی بە فێڵ و بە تێکەڵکردنیان لەگەڵ سریلاکی نوێدا بیانخاتە بازاڕەوە.

لێدوانی فەرمی: هیوا ساڵح، نوێنەری تەندروستیی سلێمانی لە لیژنە هاوبەشەکانی قایمقامیەت بە ئاڤای ڕایگەیاند: "ئەم سریلاکانەمان لە کۆگایەکدا دۆزیوەتەوە. خاوەنەکەی ویستوویەتی لە بازاڕدا ساغی بکاتەوە و فێڵێکی بەکارهێناوە بەوەی چەند دانەیەکی ماوەبەسەرچووی تێکەڵی کارتۆنێک سریلاکی نوێ کردووە."

زانیاریی زیاتر: سەرجەم پاکەت و قوتووە دەستبەسەرداگیراوەکان ماوەکەیان بەسەرچووە و ئەگەر بخرابانەتە بازاڕەوە، مەترسییەکی گەورەی تەندروستییان بۆ منداڵان دروست دەکرد لەبری ئەوەی یارمەتیدەر بن بۆ گەشەیان.

ئەمەش بزانە: سریلاک خواردنێکی گرنگە بۆ گەشەی منداڵان و سەرچاوەیەکی باشی ڤیتامین و کانزایە. بەڵام خواردنی سریلاکی ماوەبەسەرچوو دەتوانێت ببێتە هۆی ژەهراویبوون، تێکچوونی گەدە و ڕیخۆڵە، سکچوون، ڕشانەوە و لە هەندێک حاڵەتدا مەترسی گەورەتری تەندروستی.

لەلایەکی دیکە: هیوا ساڵح ئاماژەی بەوەشدا کە: "هەموو سریلاکەکان لەناودەبەین و خاوەنەکەشی دەدرێت بە دادگا."