ئاڤا زانیاریی له‌باره‌ی هەڵمەتی ده‌ستبه‌سه‌رداگرتنی ماتۆڕسكیل له‌ هه‌ولێر دەخاتەڕوو

ئاڤا نیوز

 

هەڵمەتی مەفرەزەکانی پۆلیس و پۆلیسی هاتووچۆ لە شاری هەولێر بۆ دەستبەسەرداگرتنی ماتۆرسکیل و پاسکیلە بێ ژمارە و بێ سەرەتاکان، ناڕەزایەتی و نیگەرانییەکی زۆری لەناو ماتۆڕسواران و پاسکیلسواران دروست کردووە.

چیرۆکی سەرەکی: ڕۆژی سێشەممە، مەفرەزەیەکی پۆلیس و هاتووچۆ بە کرێنەوە چوونەتە ناو بازاڕی شاری هەولێر، ئەمەش وای کردووە هیچ خاوەن ماتۆرسکیلێکی بێ ژمارە نەتوانێت بەو ناوچەیەدا تێپەڕێت.

ئەوەی پێویستە بیزانیت: ژمارەیەکی زۆر لە ماتۆرسواران داوایان لە ئاڤا کردووە دەنگیان بگەیەنێت و گلەیی خۆیان دەربڕیوە. هەندێکیان باس لەوە دەکەن کە کاسبکارن و بە ماتۆرسکیلەکانیان کار دەکەن، بەڵام ئێستا بەهۆی هەڵمەتەکەوە ناتوانن بچنە ناو بازاڕ و بێکار ماونەتەوە، چونکە بە دەستبەسەرداگرتنی ماتۆرسکیلەکانیان دەستیان بەسەر دەگیرێت.

هەندێکی دیکە ئاماژە بەوە دەدەن کە ماتۆرسکیلەکانیان بە شێوەیەکی یاسایی هاوردە کراون و خاوەنی مەنەفێست و بەڵگەنامەی فەرمین، بەڵام لەگەڵ ئەوەشدا دەستیان بەسەردا دەگیرێت، ئەمەش پرسیاری گەورەی دروست کردووە لەسەر ڕێکارەکانی دەستبەسەرداگرتن.

کۆمەڵێکی تری ماتۆرسواران داوا دەکەن کە ڕێگەچارەیەک بۆ ئەو ماتۆرسکیلانە بدۆزرێتەوە کە بێ سەرەتا و بێ ژمارەن، وەک پێدانی ماوەیەک بۆ گۆڕینی ماتۆرسکیلەکانیان یان ژمارەیان پێ بدرێت بە شێوەیەکی یاسایی.

عەقید هێمن حەمەدەمین، وتەبێژی پۆلیسی هاتووچۆی هەولێر، بە ئاڤای ڕاگەیاند: "هەر ماتۆرسکیلێک بە یاسایی هاوردە کرابێت و مەنەفێستی هەبێت، دەستی بەسەردا ناگیرێت و کێشەی نییە." بەڵام جەختی لەسەر ئەوەش کردەوە: "ئەوانەی بێ سەرەتا و بێ ژمارەن، بە بڕیاری وەزارەتی ناوخۆ، لە هەر شوێنێک ببینرێن دەستیان بەسەردا دەگیرێت."