هۆشدارییەک لە ئاسایشی نیشتمانییەوە بۆ ئەوانەی واتسئاپ بەکاردەهێنن

ئاڤا نیوز

دەزگای ئاسایشی نیشتمانیی عێراق، وەک هەنگاوێک بۆ پاراستنی هاووڵاتیان، هۆشدارییەکی بەپەلەی لەبارەی هەوڵەکانی فێڵکردنی ئەلیکترۆنی لە ڕێگەی واتسئاپەوە بڵاو کردەوە.

 

ڕاگەیێنراوی فەرمی: بەگوێرەی ڕاگەیێنراوی دەزگاکە، ئەرشەد حاکم، وتەبێژی دەزگای ئاسایشی نیشتمانی ڕایگەیاند، دەزگاکەیان چاودێریی هەوڵەکانی فێڵکردنی ئەلیکترۆنی دەکەن لە ڕێگەی ئەپڵیکەیشنی واتسئاپەوە. فێڵبازان لەم ڕێگەیەوە هاووڵاتیان هەڵدەخەڵەتێنن بە داواکردنی کۆدی پشتڕاستکردنەوەی تایبەت بە ئەپڵیکەیشنەکە، بە مەبەستی کۆنتڕۆڵکردنی هەژمارەکانیان. دواتر ئەم هەژمارانە بەکار دەهێنن بۆ داواکردنی پارە، دزینی زانیاریی کارتی بانکی و بڵاوکردنەوەی لینکە زیانبەخشەکان.

 

لەهەما کاتدا: دەزگاکە جەخت لەوە دەکاتەوە ڕووبەڕووبوونەوەی ئەم هەوڵانە پێویستی بە وشیارییەکی زۆر هەیە. هاووڵاتیان دەبێت خۆیان بەدوور بگرن لە بەشداریکردنی هەر کۆدێک یان زانیارییەکی کەسی، هەروەها کارلێک لەگەڵ هیچ هەژمار یان لینکی گوماناوی نەکەن. گرنگە لە کاتی ڕووبەڕووبوونەوە یان گومانکردن، دەستبەجێ لایەنە پەیوەندیدارەکان ئاگادار بکرێنەوە.

 

لەلایەکی دیکەوە: دەزگای ئاسایشی نیشتمانی دووپاتی دەکاتەوە، پاراستنی هاووڵاتیان و زانیارییەکانیان لە پێشینەی کارەکانیاندایە و هۆشیاری و ئاگایی بە یەکەمین هێڵی بەرگری دادەنرێت لە دژی ئەم جۆرە فێڵکارییە ئەلیکترۆنییە.