40 کاندیدی دیکە لە کێبرکێی هەڵبژاردن دوورخرانەوە

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق، بڕیاری دوورخستنەوەی 40 کاندیدی دیکەی لە کێبرکێی هەڵبژاردن دوورخستنەوە، بەمەش کۆی ئەوانەی دوورخراونەتەوە نزیک دەبێتەوە لە 800 کاندید.

 

وێنە گەورەکە: بڕیارە 11-11-2025، هەڵبژاردنی خولی نوێی پەرلەمانی عێراق بکرێت و زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، تا ئێستاش کۆمیسیۆن بەهۆکاری جیاواز ژمارەیەک کاندیدی دوورخستوونەتەوە.

 

بەڵگەنامەی فەرمی: ئاڤا نیوز چەند بەڵگەنامەیەکی دەستکەوتووە کە بڕیاری ئەنجوومەنی کۆمیسیاران نیشان دەدات، لە یەکێک لە بەڵگەکاندا بڕیاری دوورخستنەوەی 39 کاندید دراوە، کۆمیسیۆن هۆکارەکەی خستووەتەڕوو و دەڵێت: "بەهۆی ڕەتکردنەوەی تانەکانیان چونکە ڕێکارەکانی دەستەی نیشتمانیی لێپرسینەوە و دادپەروەری دەیانگرێتەوە".

 

لەهەمان کاتدا: بەگوێرەی بەڵگەنامەیەکی دیکەی کۆمیسیۆن کە لە ئەنجوومەنی کۆمسیارانەوە دەرچووە، بڕیاردراوە بە دوورخستنەوەی "سەجا بەیاتی" لە هاوپەیمانیی تەفەوق لە پارێزگای سەلاحەدین، بەهۆی پابەند نەبوونی بە یاساکانی ڕەفتاری تایبەت بە کاندیدەکان.

 

ئەوەی پێویستە بیزانیت: پێشتر عیماد جەمیل، سەرۆکی تیمی ڕاگەیاندنی کۆمیسیۆنی هەڵبژاردنەکان، ئاشکرای کردبوو ژمارەی دوورخراوەکان لە کێبڕکێی هەڵبژاردن گەیشتووەتە 751 کاندید.