یەکێک لە بریندارانی ئاگرەکەی پێجوێن گیانی لەدەست دا

ئاڤا نیوز

 

ئەمڕۆ یەکێک لە بریندارەکانی ئاگرەکەی سنووری پێنجوێن گیانی لەدەست دا، قایمقامی پێنجوێن لەوبارەیەوە دەڵێت، "کار بۆ ئەوە دەکەین کە بە شەهیدی ژینگە بناسرێت".

 

وێنە گەورەکە: ڕۆژی 30-8-2025، ئاگرێکی گەورە لە شاخی قەڵا کچێ لە سنووری پێنجوێن کەوتەوە، دوای 24 کاتژمێر لەلایەن تیمەکانی بەرگریی شارستانی و پۆلیسی دارستان و ژینگە و خەڵکی خۆبەخشی دەڤەرەکە توانرا ئاگرەکە کۆنترۆڵ بکرێت، بەڵام دوو خۆبەخش بە سەختی برینداربوون.

 

لێدوانی فەرمی: هێمن ئیبراهیم، قایمقامی پێنجوێن بە ئاڤا میدیای ڕاگەیاند: سەرلەبەیانیی ئەمڕۆ چوارشەممە، یەکێک لە بریندارەکان بەناوی 'ئالان یوسف'ی تەمەنی 25 ساڵ کە خەڵکی گوندی کواوا سەر بە قەزای پێنجوێنە گیانی لەدەست دا.

 

قایمقامی پێنجوێن دەڵێت، بەهۆی ئاگرکەوتنەوەکەی پێنجوێن دوو کەس بریندار بوون، ئاڵان یوسف زیاتر لە 50٪ی جەستەی سووتابوو، بەهۆی سەختی برینەکەیەوە دوای زیاتر لە 20 ڕۆژ گیانی لەدەست دا، ئەوی دیکەیان ناوی بێستوون عەبدوڵڵایە کە بریندارەکەی دیکەیە و لە ژێر چاودێریی چڕەدایە لە یەکێک لە نەخۆشخانەکانی سلێمانی.

 

هەنگاوی داهاتوو؛ قایمقامیەتی پێنجوێن کار بۆ بە شەهید ناساندنی ئالان یوسف، وەکو شەهیدی ژینگە دەکات، بۆ ئەو مەبەستەش لەگەڵ پارێزگاری سلێمانی و وەزارەتی ناوخۆ بابەتەکە تاوتوێ دەکات.