کارتی بایۆمەتریی دەنگدان لە هەولێر دابەش دەکرێت

ئاڤا نیوز

 

ئەمڕۆ چوارشەممە لە هەولێر دەست بە دابەشکردنی کارتی بایۆمەتریی دەنگدان دەکرێت و داوا لە هاووڵاتیان دەکرێت بۆ وەرگرتنەوەی کارتەکانیان سەردانی بنکەکان بکەن.

 

وێنە گەورەکە: بڕیارە 11-11-2025، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت، زیاتر لە حەوت هەزار کاندید کێبڕکێ لەسەر 329 کورسییەکەی پەرلەمان دەکەن، کۆمیسیۆنیشی لە ئامادەکارییەکانی بەردەوامە.

 

لێدوانی فەرمی: مەروان محەممەد نەجاڕ، بەڕێوەبەری ئۆفیسی هەولێری هەڵبژاردنەکانی عێراق، بە ئاڤا میدیای ڕاگەیاند، ژمارەی ئەو کارتە نوێیانەی گەڕاوەنەتەوە 90 هەزار و 78 کارت دەبێت، هاووڵاتیان دەتوانن بۆ وەرگرتنەوەیان سەردانی بنکەکان بکەن، کە لە کاتژمێر هەشتی بەیانی تاوەکو سێی دوای نێوەڕۆ کراوەن.

 

گوتیشی، نزیکەی 16 هەزار کارتی ساڵی 2020 و 2021 لە بنکەکانمان ماون ئەوانیش ئامادەن و هاووڵاتیان دەتوانن وەریانبگرنەوە.

زانیاریی زیاتر: وەرگرتنەوەی کارت لە ئەمڕۆوە تاوەکو ڕۆژی هەڵبژاردن بەردەوام دەبێت، داوا لە هاووڵاتیان دەکرێت سەردانی بنکەکان بکەن لە شار و شاروچکەکان بۆ وەرگرتنەوەی کارتەکان.

 

ئەوەی پێویستە بیزانیت: ئەو کارتانەی ئێستا بە هاووڵاتیان دەدرێنەوە وه‌جبه‌ی یه‌که‌من کە سەرجەم پارێزگاکانی عێراق دەگرێتەوە و دابەشکردنەکە لەڕێگەی بنکەکانی تۆمارکردنەوە دەبێت، تیمە گەڕۆکەکانیش بەمەبەستی ئاسانکاری و خێراکردنی پڕۆسەکە دەنێردرێنە ناوچە جیاوازەکان بۆ گەیاندنی کارتەکان بە دەنگدەران.