كرێی كارەبای نیوەی هاووڵاتیانی كوردستان لە مانگێکدا كەمتر لە 27 هەزار دینار گەڕاوەتەوە

ئاڤا نیوز

بۆ مانگی هەشت، نیوەی هاووڵاتیانی هەرێمی كوردستان لە پڕۆژەی ڕووناكیدا، کەمتر لە 27 هەزار دیناریان بۆ گەڕاوەتەوە، بەراوردی نێوان شارەكانیش، پسوولەی كارەبا لە شاری سلێمانی، لە سەرانسەری هەرێمی كوردستان كەمترین بووە.

وێنە گەورەكە: مانگی 11ـی ساڵی ڕابردوو، مەسرور بارزانی، سەرۆکوەزیرانی حکومەتی هەرێمی کوردستان، پڕۆژەی ڕووناکیی كارەبای 24 كاتژمێری ڕاگەیاند. تاوەکو ئەمڕۆ، نزیکەی 4 ملیۆن هاووڵاتی کە دەکاتە زیاتر لەنیوەی هاووڵاتیانی کوردستان پرۆژەكەیان پێ گەیشتووە، تا كۆتایی ساڵی 2026ـش، پرۆژەكە بە سەرانسەری هەرێمی كوردستان دەگات.

ئەوەی پێویستە بیزانیت: حكومەتی هەرێمی كوردستان، هەر لەگەڵ ڕاگەیاندنی پڕۆژەی ڕووناكی، بەڵێنی ئەوەی بە هاووڵاتیان دا كە لەگەڵ ئەوەی لە كارەبای 24 كاتژمێری سوودمەند دەبن، چەند ئەوەندەی پێشوو، كرێی كارەبایان لەسەر كەم دەبێتەوە.

زانیاریی بەدەستهاتوو: بەگوێرەی پسوولەی كارەبا بۆ مانگی هەشت، تێكڕای كرێی مانگانەی كارەبای ماڵان 27 هەزار دینارە، بەجۆرێك هەولێر؛ 37 هەزار، سلێمانی؛ 15 هەزار، دهۆك؛ 38 هەزار دینار.

هەرچی كرێی كارەبای شوێنە بازرگانییەكانە، تێكڕای كرێی مانگانە 79 هەزار دینار بووە، هەولێر؛ 88 هەزار، سلێمانی؛ 72 هەزار، دهۆك؛ 67 هەزار دینار.