لە ناسرییە خێزانێک بە تۆمەتی بازرگانیکردن بە ماددە هۆشبەرەکان دەستگیر دەکرێن

ئاڤا نیوز

خێزانێکی سێ کەسی بە تۆمەتی بازرگانیکردن بە ماددە هۆشبەرەکان لە قەزای شەتڕە لە باکووری ناسرییە، دەستگیر دەکرێن، لەنێو دەستگیرکراوەکان ئافرەتێک هەیە.

وێنە گەورەکە: بەدەر لە بەکارهێنەرانی؛ چەندین تۆڕی ناوخۆیی و نێودەوڵەتیی تایبەت بە ماددەی هۆشبەر و قاچاخچی لە عێراقدا چالاکن، بەپێی نوێترین ڕاپۆرتی نەتەوەیەکگرتووەکان کە لە ڕێگەیەوە هۆشداری دابوو، خەریکە عێراق دەبێتە ناوەندێک بۆ بڵاوبوونەوەی ماددە هۆشبەرەکان لە ناوچەکەدا.

زانیاریی تایبەت: سەرچاوەیەکی ئەمنی لە پارێزگاکە بە ئاڤا میدیای ڕاگەیاند: "دەستگیرکراوەکان پیاوێک و هاوسەرەکەی و براکەی بوون، کە چالاکییەکی ڕێکخراویان لە بڵاوکردنەوەی ماددە هۆشبەرەکان لەناو قەزاکەدا ئەنجام دەدا، پێش ئەوەی هێزە ئەمنییەکان هەڵبکوتنە سەریان و دەستگیر بکرێن."

زانیاریی زیاتر: سەرچاوەکە ئاماژەی بەوەشدا: "هێزە ئەمنییەکان دەستیان بەسەر بڕێک ماددەی هۆشبەردا گرت کە ئامادەکرابوون بۆ دابەشکردن، جەختیشی لە بەردەوامبوونی لێکۆڵینەوەکان کردەوە بۆ ئاشکراکردنی وردەکارییەکانی کەیسەکە."