لە ئەنبار شێوازێكی نوێی گواستنەوەی ماددەی هۆشبەر شکستی پێهێنرا

ئاڤا نیوز

بەڕێوەبەرایەتی هەواڵگری سەربازی عێراق ئاشکرای کرد، هەوڵێکی گەورەی قاچاخچێتی ماددەی هۆشبەر لە پارێزگای ئەنبار شکستی پێهێنرا و  پووچەڵ کرایەوە.

وێنە گەورەکە: بازرگانیکردن و بەکارهێنانی ماددەی هۆشبەر و کارتێکەرە دەروونییەکان لەنێو هاووڵاتیانی عێراق بە تایبەتی گەنجانی نێوان 18 بۆ 30 ساڵی بووەتە دیاردە و هێزە ئەمنییەکانیش ڕۆژانە هەڵمەتی بەردەوامیان بۆ دەستبەسەرداگرتنی ئەو ماددانە و ئەو کەسانەی بازرگانی پێو دەکەن هەیە.

ڕاگەیێنراوی فەرمی: بەڕێوەبەرایەتی هەواڵگری سەربازی عێراق لە ڕاگەیێنراوێکدا، ڕایگەیاند: کارمەندانی هەواڵگری سەربازی توانیویانە رێگری لە هاوردەکردن و گواستنەوەی 245 هەزار حەبی ماددەی هۆشبەری جۆری کەپتاگۆن بۆ نێو خاکی عێراق بکەن.

زانیاریی زیاتر: هەواڵگری سەربازی عێراق ئەوەشی خستەڕوو، قاچاخچییەکان بە شێوازێکی نوێ و داهێنەرانە، ویستویانە لە رێگەی باڵۆنێکەوە ئەم بڕە زۆرەی حەب لە بیابانەکانی ئەنبارەوە بۆ نێو خاکی عێراق بگوازنەوە.