ترەمپ و شەرع لە نیویۆرک چاویان بە یەکتری کەوت

ئاڤا نیوز

لە پەراوێزی کۆبوونەوەی ئەنجوومەنی گشتی نەتەوەیەکگرتووەکان، دۆناڵد ترەمپ، سەرۆکی ئەمریکا و ئەحمەد شەرع، هاوتا سوورییەکەی چاویان بە یەکتری کەوت.

چیرۆکی سەرەکی: ڕۆژانی 22 بۆ 30 ئەیلوول لە بارەگای نەتەوەیەکگرتووەکان لە نیویۆرک کۆبوونەوەکانی 80 ـەمین خولی کۆمەڵەی گشتیی نەتەوەیەکگرتووەکان بەڕێوەدەچێت، ئەحمەد شەرع، وەک سەرۆکی سووریا ئامادەیی کۆبوونەوەکە بووە.

زانیاریی بەدەستهاتوو: بەرەبەیانی ئەمڕۆ پێنجشەممە، ئاژانسی فەرمی سووریا بڵاوی کردەوە، ئەحمەد شەرع، سەرۆککۆماری سووریا لەگەڵ دۆناڵد ترەمپ، سەرۆکی ئەمریکا کۆبووەوە، بەڵام وردەکاریی سەبارەت بە دیدارەکە  نەخراوەتەڕوو.

ئەمەش بزانە: ئەمە دووەمین دیداری نێوان شەرع و ترەمپە، یەکەم کۆبوونەوەیان لە مانگی ئایاری ڕابردوو لە ڕیازی پایتەختی سعوودیە بوو.

ئەوەی پێویستە بیزانیت: شەرع بووە یەکەم سەرۆکی سووریا کە بەشداریی کۆبوونەوەکانی نەتەوەیەکگرتووەکان بکات دوای ساڵی 1967، کاتێک نوورەدین ئەتاسی، سەرۆکی وڵات بوو، چونکە پێشتر نە بەشار ئەسەد، سەرۆکی پێشووی ڕژێم و نە باوکی بەشداریی ئەم کۆبوونەوانەیان نەکردووە.