پارەی خزمەتگوزارییەكانی سڕینەوە، گواستنەوە و زیادكردن لە فۆرمی ئەلیكترۆنیی خۆراك كەم دەكرێتەوە

ئاڤا نیوز

هەرچەندە پێشووتر بڕیاری لێ درابوو كە خزمەتگوزارییەكانی سڕینەوە، لابردن و زیادكردن و گواستنەوە لە فۆرمی ئەلیكترۆنی پسوولەی خۆراك 10 هەزار دینار بێت، بەڵام بە بڕیارێك ئەو بڕە پارەیە كەم كرایەوە.

چیرۆکی سەرەکی: دوای ئەوەی پڕكردنەوەی خۆڕایی فۆرمی ئەلیكترۆنی پسوولەی خۆراك لە ئەپڵیكەیشن لە سەرجەم عێراق وەستا، لە ئێستادا خزمەتگوزارییەكانی سڕینەوە، لابردن و زیادكردن و گواستنەوە تەنیا لە پارێزگای واست بەردەستە و لە ئایندەیەکی نزیک لە سەرجەم پارێزگاکان بەردەست دەبێت.

لێدوانی فەرمی: سیامەند قادر نانەكەلی، بەڕێوەبەری ڕێكخستنی پسوولەی خۆراكی هەولێر بە ئاڤای ڕاگەیاند: ئێستا لە عێراق تەنیا لە پارێزگای واست خزمەتگوزارییەكانی سڕینەوە و لابردن و و گواستنەوە و زیادكردنی ئەندامی خێزان لە فۆڕمی ئەلیكترۆنی پسوولەی خۆراك كارا كراوە و چاوەڕوانین لە ماوەی داهاتوودا پرۆسەكە لە هەرێمی كوردستانیش كارا بكرێت، بەڵام تاوەكو ئێستا وادەكەی دیار نەكراوە بە هۆی ئەوەی پێویستی بە ئامادەكاری هەیە لە هەر  بەڕێوەبەرایەتییەك.

زانیاریی زیاتر: بەڕێوەبەری ڕێكخستنی پسوولەی خۆراكی هەولێر ئاماژەی بە ئەوەش دا كە پێشووتر بە فەرمی داوایان كردووە بڕی ئەو پارەیەی بۆ مامەڵەی زیادكردنی ئەندام و سڕینەوە و لابردن و گواستنەوە وا بڕیارە لە هاووڵاتی وەربگیرێت كەم بكرێتەوە، ئێستا بە فەرمی بۆ هەر مامەڵەیەك پێنج هەزار دینار وەردەگیرێت و پێشووتر بڕیار درابوو كە 10 هەزار دینار بێت.

ئەوەی پێویستە بیزانیت: مامەڵەكە لەڕێگەی ئەپی پسوولەی خۆراكەوە دەكرێت، هاووڵاتی دەتوانێت لەڕێگەی مۆبایلەكەیەوە مامەڵەكە ئەنجام بدات و شێوازی پارەدانەكەش هەر لەڕێگەی ئەلیكترۆنییەوە دەبێت.