عێراق لە مانگی ئاب بە بەهای زیاتر لە حەوت ملیار دۆلار نەوتی فرۆشتووە

ئاڤا نیوز

کۆمپانیای بەبازاڕکردنی نەوتی عێراق (سۆمۆ)، بڕی هەناردەی نەوت بۆ مانگی ئاب ئاشکرا دەکات و ئاماژە بۆ ئەوە دەکات بەهای ئەو نەوتەی هەناردە کراوە دەگاتە زیاتر لە حەوت ملیار دۆلار.

وێنە گەورەکە: عێراق بۆ بودجەی ساڵانەی بە شێوەیەکی سەرەکی پشت بە فرۆشتنی نەوت دەبەستێت، کە ڕێژەکەی دەگاتە نزیکەی 92%، ئەوەی دیکە بە داهاتی نانەوتی پڕی دەکاتەوە.

ڕاگەیێنراوی فەرمی: بەگوێرەی ڕاگەیێنراوی سۆمۆ، کۆی هەناردەی نەوتی خاوی عێراق لە مانگی ئابی ئەمساڵ 104 ملیۆن و 806 هەزار و 884 بەرمیل بووە، داهاتەکەشی بریتی بووە لە حەوت ملیار و 160 ملیۆن دۆلار.

ژمارەکان وادەڵێن: هەر بەگوێرەی ڕاگەیێنراوەکەی سۆمۆ هەناردەی نەوتی خاو لە کێڵگە نەوتییەکانی ناوەڕاست و باشوور 103 ملیۆن و 895 هەزار و 706 بەرمیل بووە، بڕی 911 هەزار و 178 بەرمیلیش بەرهەمی کێڵگەی گەیارە بووە. ئاماژە بۆ ئەوەش دەکات کە لە ماوەی ئەو مانگە (مانگی هەشت) هیچ بڕێک نەوتیان بۆ ئوردن هەناردە نەکردووە.