کۆمیسیۆن هەریەک لە سوودانی و مالیکی و حەلبووسی سزا دەدات

ئاڤا نیوز

بەهۆی پێشێلکردنی مەرجەکانی بانگەشەکردن، کۆمیسیۆنی هەڵبژاردنەکان چەند لایەنێکی سیاسی لەوانەش؛ هاوپەیمانیەتییەکانی محەممەد شیاع سوودانی، نووری مالیکی و محەممەد حەلبووسی سزا دەدات.

چیرۆکی سەرەکی: کۆمیسیۆنی هەڵبژاردنەکان ژمارەیەک کاندیدی هەشت لایەنی سیاسی بەهۆی بانگەشەی پێشوەختە بە بڕی دوو ملیۆن دینار بۆ هەر یەکێک لەو کاندیدانە سزا دا.

ڕاگەیێنراوی فەرمی: بەگوێرەی نووسراوی کۆمیسیۆنی باڵای سەربەخۆی هەڵبژاردنەکان، شەش کاندیدی هاوپەیمانیی ئاوەدانی و گەشەپێدان بە سەرۆکایەتیی محەممەد سوودانی، حەوت کاندیدی حیزبی تەقەدووم کە محەممەد حەلبووسی سەرۆکایەتیی دەکات و دوو کاندیدی هاوپەیمانیی دەوڵەتی یاسا بە سەرۆکایەتیی نووری مالیکی لە پارێزگای بەغدا بە بڕی دوو ملیۆن دینار سزا دران.

زانیاریی زیاتر: دوو کاندیدی هاوپەیمانیی ئەساسی عێراقی بە سەرۆکایەتیی موحسن مەندەلاوی، چوار کاندیدی بزووتنەوەی سادیقون باڵی سیاسیی گرووپی چەکداریی عەسائیبی ئەهلی حەق کە قەیس خەزعەلی ئەمینداری گرووپەکەیە لەگەڵ چەند لایەنێکی دیکە بەر ئەو سزایە کەوتوون.