لە سنووری خانەقین بازگەیەک "بووەتە ناوەندێک بۆ قاچاغچیەتی و کاری نایاسایی"

ئاڤا نیوز

 

بەگوێرەی زانیارییەکانی ئاڤا بازگەی باوە مەحموود لە سنووری قەزای خانەقین، کە دوای 16ی ئۆکتۆبەر بووەتە خاڵێکی سنووریی لەنێوان هەرێمی کوردستان و عێراق، گۆڕاوە بۆ ناوەندێکی قاچاغچێتی و گەندەڵی. ئەو سەرچاوەیەی قسەی بۆ ئاڤا کرد، گوتی، "شەوانە بڕێکی زۆر کاڵای قاچاغ و تەنانەت کۆچبەری بیانیش بە پارە لەم بازگەیە ئاودیوی عێراق دەکرێن".

 

زانیاریی ئاڤا: بەگوێرەی ئەو بەڵگانەی دەست ئاڤا کەوتوون دوای کاتژمێر 12ی شەو تا 4ی بەیانی، ڕێگە بە تێپەڕبوونی جۆرەها کاڵای قاچاغ دەدرێت و نرخەکانیش بەپێی جۆری کاڵاکە دەگۆڕێت، لەوانە:

-خواردنەوە کحولییەکان: یەک ترێلە بیرە بە سێ دەفتەر و نیو دۆلار، یەک ترێلە ویسکی بە پێنج دەفتەر دۆلار.

-خۆراک: مریشکی بەستووی ئۆکراینی و ئێرانی، و مریشکی زیندوو، هەریەک بە سێ دەفتەر دۆلار بۆ هەر ترێلەیەک.
-کاڵای دیکە: ماتۆڕسکیل بە دوو دەفتەر و نیو دۆلار بۆ هەر ترێلەیەک.
-نەوت: نەوتی قاچاغی ئێران بە 500 دۆلار بۆ هەر تانکەرێک.
-دەرمان: دەرمانی ماوەبەسەرچوو بە سێ دەفتەر و نیو، دەرمانی ئاسایی بە دوو دەفتەر، و دەرمانی قەدەغەکراوی نێودەوڵەتی بە پێنج دەفتەر بۆ هەر بارێک.

لەلایەکی دیکە: جگە لەمانە، ئاڤا زانیویەتی کۆچبەرانی ئەفغانی و پاکستانی بە قاچاغ و لە بەرامبەر بڕی 300 دۆلار بۆ هەر کەسێک، ڕێگەیان پێدەدرێت بپەڕنەوە بۆ عێراق. هەروەها، تەنانەت بۆ گواستنەوەی کاڵای ئاساییش کە یاسایین، سەرانە لە هاووڵاتییان وەردەگیرێت.

 

ئەمەش بزانە: بازگەی باوە مەحموود دەکەوێتە سنووری قەزای خانەقین لە پارێزگای دیالە و لەلایەن هێزە عێراقییەکانەوە بەڕێوەدەبرێت، کە بریتین لە سوپا، حەشدی شەعبی و پۆلیس. هاووڵاتییان دەڵێن، بەرپرسێکی کوردیش هاوبەشە لەم چالاکییە نایاساییانەدا.

 

لێدوانە فەرمییەکان: جەواد فەیزوڵڵا، قایمقامی خانەقین، بە ئاڤای ڕاگەیاند، ڕۆژانە گلەیی و سکاڵای هاووڵاتییان لەبارەی بازگەکە پێدەگات لەسەر بێزارکردن و هەراسانکردنیان. ناوبراو گوتیشی کە بەدواداچوون بۆ ئەم تۆمەتانە دەکەن و هەر پێشێلکارییەک ئاشکرا بێت، نووسراو بۆ ئەنجومەنی پارێزگای دیالە دەکەن.

 

- دیار شەوکەت، بەڕێوەبەری پۆلیسی خانەقین، بە توندی ئەو تۆمەتانە ڕەتدەکاتەوە. ناوبراو بە ئاڤای گوت، گواستنەوەی کاڵا بە قاچاغ لەو بازگەیە هیچ بنەمایەکی نییە و تەنیا ڕێگە بە بەرهەمی ناوخۆیی کوردستان دەدرێت بچێتە نێو عێراق و هیچ کاڵایەکی هاوردەکراو لەو بازگەیە ناچێتە عێراق.

 

لەبارەی کۆچبەرانیشەوە، بەڕێوەبەری پۆلیسی خانەقین گوتی: "ڕێگە نادەین هیچ هاووڵاتییەک لەو بازگەیە بە قاچاغ تێپەڕبێت." ناوبراو ئاشکرای کرد کە لە ماوەی ڕابردوودا 30 هاووڵاتی ئەفغانی دەستگیرکراون کە لەژێر تانکەر و ناو بارهەڵگرەکان خۆیان حەشاردابوو و دەیانویست بە قاچاغ تێپەڕبن، و ئێستا سەرجەمیان لە زینداندان.