زێلینسکی داوای مووشەکی تۆماهۆک لە ترەمپ دەکات

ئاڤا نیوز

بەرپرسانی ئۆکراینا دەڵێن، ڤۆلۆدیمیر زێلینسکی، سەرۆکی ئوکراینا، لە کۆبوونەوەی ڕۆژی سێشەممەی لەگەڵ دۆناڵد ترەمپ، سەرۆکی ئەمریکا، داوای مووشەکی تۆماهۆکی کردووە. ئەم مووشەکانە توانای ئەوەیان هەیە بگەنە قووڵایی خاکی ڕووسیا، تەنانەت تا مۆسکۆش.

وێنە گەورەکە: دوای دوو ساڵ لە هێرشەکانی ڕووسیا بۆسەر ئۆکراینا، ئەو وڵاتە دەیەوێت ڕووسیا ناچار بە دانوستانی ئاشتی بکات، بۆیە داوای پێشکەوتووترین و بەهێزترین مووشەکی لە ئەمریکا کردووە.

لێدوانی فەرمی: ڤۆلۆدیمێر زێلینسکی، سەرۆکی ئۆکراینا ڕایگەیاند، داوای سیستمێکی پێشکەوتووم لە ترەمپ کردووە کە دەتوانێت ڤلادیمێر پووتین، سەرۆکی ڕووسیا، ناچار بکات بچێتە ناو دانوستانەکانی ئاشتییەوە، ڕەنگە بەبێ ئەوەی ئوکراینا پێویستی بە بەکارهێنانیشی بێت.

زانیاریی زیاتر: زێلینسکی لە کاتی چاوپێکەوتنەکەیدا ناوی ئەو سیستمەی نەهێنا، بەڵام جەختی کردەوە کە ئەگەر ڕووسیا بزانێت ئوکراینا ئەو چەکەی هەیە، گوشار بۆ دانوستانەکان بە شێوەیەکی بەرچاو زیاد دەکات.

زانیاری بەدەستهاتوو: بەرپرسێکی ئوکراینی و سەرچاوەیەکی دیکەی ئاگادار لە کۆبوونەوەی ترەمپ و زێلینسکی بە پێگەی ئەکسیۆسی ئەمریکیان ڕاگەیاندووە، ئەو چەکەی زێلینسکی داوای کردووە، مووشەکی تۆماهۆک بووە کە مووشەکێکی دوورهاوێژ و وردە لە پێکانی ئامانجەکەی.

ئەوەی پێویستە بیزانیت: ئوکراینا لە ماوەی ساڵی ڕابردوودا چەندین جار باسی مووشەکەکانی تۆماهۆکی لەگەڵ ئەمریکا کردووە، لەوانەش لە لیستی ئەو چەکانەی کیێڤ چەند مانگێک لەمەوبەر داوای کردبوو.

ئەمەش بزانە: مووشەکی تۆماهۆک کە لەلایەن RTX دروست دەکرێت، مەودایەکی زۆر دوورتر لەو مووشەکانەی ناتۆ دەبڕێت کە هەیانە، کە دەگاتە نزیکەی هەزار و 609 کیلۆمەتر، هەروەها زۆر خێراترە لە فڕۆکە بێفڕۆکەوانەکانی ئوکراینا و هێزی تەقینەوەی زیاترە.